Фенербахче и Лаборал Куча обезбедија полуфинале, Барса има меч-топка (видео)

Вечерва се одиграа три натпревари во кошаркарската Евролига. Антиќ со Фенербахче и екипата на Лаборал Куча обезбедија полуфинале.

Фенербахче со 3-0 во партии го совлада актуелниот европски шампион, Реал Мадрид, и се пласираше во фајнал-форот на Евролигата.

После двете победи во Истанбул, тимот на Жељко Обрадовиќ вечерва славеше и во Мадрид со удедливи 63-75 и си обезбеди карта за Берлин, каде ќе се одигра завршницата меѓу четирите најдобри европски клубови, и каде веќе ги чекаат ЦСКА Москва и Лаборал Куча.

Реал Мадрид единственото водство го имаа само во првата четвртина, а потоа Фенербахче покажа дека е подобар тим сезонава. На полувреме заминаа со седум поени разлика.

Вистинската игра на тимот на Обрадовиќ ја видовме во средината и крајот на третата четвртина, кога во целост го надиграа Реал и имаа и 14 поени предност. Во последната четвртина Фенербахче во еден момент имаше и високи 17 поени предност.

Богдановиќ беше најпрецизен во победничкиот тим со 17 поени и 14 скокови. Калиниќ имаше 11 поени и 8 скокови. Удох додаде 15, а Датоме 13 поени. Нашиот Перо Антиќ го заврши натпреварот со 4 поени и 8 скокови.

Ова ќе биде 15 фајнал-фор во кариерата на легендарниот Жељко Обрадовиќ.

Противник на Фенербахче ќе им биде екипата на Лаборал Куча.

Најпријатното изненадување во Евролигата сезонава, екипата на Лаборал Куча, исто така по само три одиграни натпревари се пласираше во фајнал-форот, откако вечерва со 84-75 го совлада Панатинаикос и со вкупни 3-0 го надигра тимот на Александар Ѓорѓевиќ.

За последниот патник во полуфиналето во Берлин ќе почекаме уште минимум еден натпревар. Барселона вечерва славеше над Локомотив Кубан со 82-70 и поведе со 2-1 во серијата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.