Македонскиот млад балетски уметник Марко Мицов беше дел од трупата на познатата Баланшинова примабалерина, Гелси Кирклен, како и во Атлантик сити балетот…
Тој во овие трупи ги исполни насловните ролји во балетот „Оревокршачка“, „Сон на летната ноќ“, „Карневал во Венеција“ и други. На почетокот на годината како гостин настапуваше во улогата на Дон Хозе во балетот „Каремн“ во Гинсвил балет во Вашингтон.
Мицов веќе шеста година како ја гради својата танчерска кариера во САД. Од пред еден месец тој настапува за трупата на Сан Антонио во Тексас. Артистички директор на трупата од неодамна е Вили Шивес, кој беше првенец на трупата на Џофри балетот, како и националните трупи на Минесота, Питсбург, Милвоки…
Шивес е овластен претставник за кореографската оставнина на Ентони Тудор, како и за делата на Џералд Арпино и на Роберт Џофри Фондацијата. Неговиот прв деби како раководител на трупата се одржа на 8 и 9 април во Тобин центарот за перформативни уметности во Сан Антонио. На оваа изведба на Мицов му беше доделена задачата да биде дел од претставата „Tribute“ во кореографија на Фредерик Франклин.
Марко Мицов со првенката на компанијата Сали Туркел ги толкуваа главните ролји во балетот. Медиумите мошне позитивно го оценија целокупниот настан, каде што Мицов беше пофален за својата извонредна игра.
Мицов беше на страниците на престижниот Њујорк тајмс со исклучително пофални зборови за неговата игра во балетот „Оревокршачка“. Мицов своето образование го стекна во ДМБУЦ „Илија Николовски -Луј“ кај професорката Соња Здравкова-Џепароска.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
