Важни победи на Далас, Детроит и Индијана во борбата за плеј-офот (видео)

Екипите на Далас, Детроит и Индијана остварија важни победи во борбата за плеј-офот, во синоќешните дуели од НБА лигата.

Во директната битка, можеби и клучен натпревар, Далас на домашен терен беше подобар од Хјустон со 88-86 за своја петта едноподруго победа. Сега Далас е седми со скор од 40-38, Јута е осма со 39-39, а Хјустон е сега под цртата со скор од 38-40.

Клучен човек во победата на Далас беше Џеј-Џеј Баре со 27 поени, пет скока и осум асистенции.

– Сакам да играм брзо, но моментално поспоро темпо ни одговара на натпреварите и ќе продолжиме така – рече Баре.

Токму тој погоди со прекршок за 85-85, Харден промаши во завршницата, а Херис од слободни фрлања го запечати натпреварот.

Кај Хјустон најефикасен беше Џејмс Харден со 26 поени, Хауард имаше 14 поени и 16 скока, а 15 поени дополни Бизли.

Индијана го доби Кливленд со 123-109. За Кавси не играше Леброн Џејмс, а Пол Џорџ ги предводеше Пејсерси со 29 поени. Мајлс имаше 21 поен, а Соломон Хил и Махинми по 15 поени.

Кајри Ирвинг беше најдобар кај Кливленд со 28 поени и шест асистенции, а Кевин Лав имаше 23 поени и пет скока.

Пејсерси сега имаа скор од 42-36 на седмото место на Истокот, а по победата над Орландо од 108-104, Детроит е осми со скор од 42-37. Чикаго сега е во се понезавидна ситуација затоа што е девети со 39-39.

НБА резултати:

ЛА Лејкерс – ЛА Клиперс 81-91
Далас – Хјустон 88-86
Портланд – Оклахома 120-115
Њујорк – Шарлот 97-111
Бостон – Њу Орлеанс 123-109
Орландо – Детроит 104-108
Вашингтон – Бруклин 121-103

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.