За жал, податоците се поразителни, ниту едно лице со аутизам не е вработено во Македонија, вели проф. д-р Владимир Трајковски, претседател на Македонското научно здружение за аутизам и редовен професор во научните области хумана генетика, медицински основи на инвалидноста, физиологија со функционална анатомија и аутистичен спектар на нарушувања на Филозофскиот факултет во Скопје. Обединетите нации во 2007 година 2 април го прогласија за Светски ден на свесноста на аутизам. Во Скопје и во Штип се отворија дневни центри за аутизам, а има најава дека ќе се отвори уште еден, во Охрид.
– За 2017 година пратеникот Сашо Василевски, на трибината што неодамна ја организиравме во Охрид, најави дека во Скопје ќе се отвори голем центар за рана детекција, дијагностика, третман и за рехабилитација на лицата со аутизам за што ние се залагаме во овие 16 години постоење – изјави претседателот на Македонското научно здружение за аутизам, проф. д-р Владимир Трајковски.
Аутизмот е невроразвојно нарушување со генетска основа. Лекарите велат дека постојано расте бројот на деца со аутизам, со нарушување од аутистичен спектар. Зошто расте бројот на деца со аутизам?
ТРАЈКОВСКИ: Во светот аутизмот зазема епидемиски размери. Веројатно тоа е така и кај нас, но ние го немаме тоа докажано. Бројот на лицата родени со ова нарушување расте од повеќе причини. Зголемена е јавната свест, докторите го дијагностицираат аутизмот за кој малку се зборуваше до пред 20-30 години. Иако се смета дека има генетска предиспозиција, сепак, и средината како фактор игра голема улога. Научниците во светот ги обвинуваат загадувачите како што се оловото, живата, пестицидите, инсектициди и разни други фактори. Во САД податокот на Центарот за контролата на болестите од 2014 година укажува на преваленција едно дете на 68 деца кои го манифестираат овој аутистичен спектар на нарушување. Тоа е алармантна бројка. Дури и во една корејска студија од пред една година се спомнува дека едно на 38 деца е аутистично.
Каков кадар треба да биде вклучен во третманот на лицата со ова нарушување?
ТРАЈКОВСКИ: Кадарот треба да биде мултидисциплинарен. По дефиниција тука спаѓа развоен педијатар, детски психијатар, дефектолог, психолог, па дури и социјален работник, логопед, окупационен терапевт. Онаму каде што ќе се утврди дека децата се пречувствителни на глутен и на казеин може да се вклучи и нутриционист. Во некои земји и лекарот по општа практика може да го најде своето место во тој тим кој би учествувал во дијагностиката, исто така и во третман на аутистичниот спектар на нарушувања.
Дали се изработи Национален регистар кој ќе го каже точниот број на лицата што имаат аутизам или нарушувања од аутистичен спектар во Македонија?
ТРАЈКОВСКИ: За жал, не. Ние како здружение веќе 16 години ја алармираме јавноста. Од пред две години имаме позитивни поместувања во Министерството за здравство. За жал, ние не сме консултирани како експерти. Но, штом ја почнале таа работа, би требало да ја завршат. Ние навиваме тоа да биде што поскоро бидејќи само со таков национален регистер може да се направи проспективна студија и да се предвиди каков кадар е потребен, колку кадар е потребен, во кои делови на Македонија треба да се лоцираат средства… Во Западна Европа и во САД постојат одлични регистри и врз основа на нив државата си ги планира трошоците во здравството. Ние како Македонско научно здружение за аутизам располагаме со сопствен регистар, каде што се регистрирани 160 лица, но таа бројка е под проценетото. До пред десетина години речиси никој не зборуваше за аутизам. За аутизмот порано не се учеше на Медицинскиот факултет. Според мене, аутизмот треба да биде еден од националните приоритети во Министерството за здравство. Бројката од 0,25 на една илјада е навистина под проценетото и сметаме дека тоа се должи на слабата едуцираност на педијатрите, на психијатрите, како и на тоа што овие случаи во минатото се воделе под други дијагнози, на пример како ментална ретардација, развојна дисфазија, алалија, забавен психомоторен развој. Кај нас проблем е менталитетот, често заради срам сакаат да ги скријат овие деца. Родителите тоа го доживуваат како најтешка дијагноза. Можеби потешко им паѓа кога ќе ја чујат дијагнозата дека нивното дете има аутизам отколку да речеме канцер или сида. Родителите тешко ја доживуваат дијагнозата и едноставно не доаѓаат на лекар за дијагностика или, пак, погрешно се надеваат дека не е аутистичен спектар и така само губат време.
Позитивната светска практика покажува дека само со вклученост во општеството, а не со изолирање на лицата со аутизам може да се придонесе за подобрување на состојбата на децата со аутизам и со нарушување од аутистичен спектар. Што кажува Вашето искуство?
ТРАЈКОВСКИ: Вклученоста во општеството е светски тренд. Во градинките започнува образовна и социјална вклученост. По дефиниција, децата со аутизам се социјално изолирани, живеат во свој сопствен свет и еден од третманите е тоа дете да се вклучи во општеството. Овој процес во училиштата почна во 2000 година и за одредени лица со пречки во развојот има подобри резултати. Кај аутизмот резултатите не се многу добри бидејќи оние потешките случаи и умерено тешките случаи е многу тешко да се социјализираат. Кај полесните случаи, дури и да се вклучат во поголем број училишта во Македонија, не постои вработен дефектолог, иако Законот е одличен и вели дека освен педагог и психолог, во стручниот тим треба да биде и дефектологот. Оние полесните случаи, со нормална или со натпросечна интелигенција, може да завршат факултет и да работат. Уште немаме податок за лице со аутизам кое завршило факултет. Можеби имаме таков случај со лице со Аспергеров синдром кој спаѓа во оваа група на аутистичен спектар. Студијата што ја изработивме со една колешка пред 6-7 години за вработувањето на овие лица кога ќе станат полнолетни е поразителна, поразителен е фактот дека нула проценти од овие лица се вработени.
Пред повеќе од три години Собранието ја изгласа Декларацијата за правата на лицата со инвалидност. Таа ги вклучува правото за едукација, здравствената заштита, вработување… Дали ова е само декларативно или навистина се почитуваат правата на лицата со аутизам?
ТРАЈКОВСКИ: Моментно повеќе е декларативно бидејќи и работодавачите не го почитуваат тој Закон. Нашата студија покажа дека тие се малку едуцирани, преку 70-80 проценти воопшто не знаат што е аутизам. Кога беа прашани дали би вработиле лице со аутизам, тие категорично ја отфрлаа таа можност, иако Законот вели дека тие лица се еднакви. Во последните пет години е изменета ситуацијата, има позитивни ветришта. Треба да се развие чувствителноста кај работодавачите, да им се објасни дека аутизмот не е заразно заболување и дека лицата со аутизам, оние што се со нормална интелигенција, со натпросечна, па и со лесна интелектуална спреченост, можат да придонесат за себеси, за компанијата и за општеството, а не да бидат товар на општеството. Во оние работи што се повторувачки, каде што има повторување на лента, па и со компјутери, лицата со аутизам можат добро да се снајдат, можат да работат разни работи дури и подобро од невротипичната популација.
Разговараше: Александра М. Бундалевска
Фото и камера: Дејан Станчевски
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Поврзани вести
-
Шок во Бордо: Суботиќ во бесознание, доби удар од голманот на Ст.Етјен
-
Кузмановска: Неспособната власт ги задолжи граѓаните за нови 21,1 милион евра
-
И јас трпев насилство од поранешниот партнер: Министерката си ја отвори душата!(видео)
-
Руси масовно дрифтаат во снег, ни полицијата не им може ништо (Видео)