Анорексијата и булимијата се чума на 21 век. Кај адолесцентите, анорексијата е на трето место од хроничните заболувања. На еден маж девет жени заболуваат од анорексија. Најбројна популација е онаа од 13 до 23 години. Кулминацијата е на 17-годишна возраст. Но, ова не значи дека нема отстапки. Ако има отстапки кај децата, тоа се од 10 до 13 години и тогаш доаѓа до запирање на растот и на развојот на телото. Дури и по средување на анорексијата, кај овие пациенти останува заостанувањето на менструалните циклуси. Истражувањата покажуваат дека анорексија може да има и до менопауза.
Што се анорексија и булимија?
НАЈДОСКА: Анорексија и булимија се бихевиорални растројства. Тоа се нарушувања во исхраната. Тие меѓусебе се добро феноменолошки издиференцирани, но етиопатогенезата им е заедничка. Според македонската класификација на болести, анорексијата е намалување на телесната тежина, држење диета која се прави свесно, со свесно гладување, а исто така, и по пат на екстремни вежби, употреба и злоупотреба на најразлични средства за забрзување на метаболизмот и тоа лаксативи, диуретици за намалување на течностите, сè со цел да се намали телесната тежина. Во основа на двете заболувања има променета перцепција за сопствениот изглед, за обликот на телото, за изгледот на телото. И кај двете заболувања постои екстремен страв од зголемувања на телесната тежина. Кај булимијата има променливи фази на прејадување, кое се случува во мали временски интервали. Прејадувањето обично е во вечерните часови, кога се земаат големи количини висококалорична храна. Се користат неадекватни методи за одржување на телесната тежина, а тоа е повраќање, кое во почетокот е провоцирано, а потоа следува и рефлексно повраќање.
Како да се препознаат и кои се првите знаци?
НАЈДОСКА: Вообичаено, болеста почнува со булимија затоа што фазите може да се менуваат една со друга – од анорексија во булимија и обратно. Пациентите што имаат булимија го имаат проблемот со рефлексното повраќање, се плашат и бараат лекарска помош. Тие се свесни за својата болест. Кај пациентите со анорексија проблемот има поголемо значење, тие никогаш не го признаваат своето заболување. Дури и при добронамерни забелешки од нивните блиски дека изгубиле преголема телесна маса, дека недоволно се хранат, тие одбиваат да го прифатат. Нивните критериуми и нивната строгост преминува во невротичност. Колку што повеќе слабеат, толку повеќе се незадоволни од својата телесна тежина. Затоа се изложуваат на екстремни физички вежби. И покрај нивната физичка исцрпеност тие имаат многу енергија, затоа многу вежбаат, што дури може да премине во фаза на аскетство. Симптомите почнуваат постепено, незабележително. Може да се појави по коментар на некој близок, дека некој е дебелко, или, пак, ако некој родител е опсесивен, па му каже на детето дека не е добро многу да се јаде. Може да се јави по некој стрес, како што се стресовите во животните циклуси – одење на училиште, раздвојување од семејството, проблеми во љубовта, одење на факултет… Поемотивните личности сакаат да ја контролираат ситуацијата. А контролата успеваат да ја направат само врз храната. Родителите обично треба да алармираат кога детето ќе почне да ја селектира храната, да зема малку калории, кога значително ќе почне да слабее. За почетна фаза се смета кога тежината ќе стане 15 отсто помалку од нормалниот индекс на масата на телото. Дваесет отсто од анорексичните пациенти имаат провоцирано повраќање. Овие лица се опсесивно врзани за храна. Постојано бараат рецепти, подготвуваат, се грижат за храната, но не ја јадат, ја кријат. Се јавува и фобија каде што центарот на фобијата е храната, а во основа на сето тоа е променетата перцепција за сопствениот изглед, за обликот на сопственото тело.
Каков треба да биде приодот во лекувањето на овие болести? Кои специјалисти треба да го сочинуваат тимот што ќе ги лекува овие болни?
НАЈДОСКА: Преку медиумите обично се етаблира изглед кој е пропишан дека е општествено и културно прифатлив, односно, за да изгледаш убаво треба да бидеш слаб. Од овие заболувања обично страдаат адолесценти кои уште немаат добро изградена структура на личноста, уште се чувствителни и се под бура на хормони. Од оваа болест страдаат и манекенки, балерини кои треба да ја одржат телесната тежина. Самодовербата не треба да се гради преку надворешниот изглед. Ние како личности имаме и други квалитети. Ако на почетокот родителите не го сфатат сериозно, заболувањето може да галопира во други стадиуми – несоница, промена на функција на органите. Се јавува анемија, леукоцитопенија, тромбоцитопенија, коагулопатии, нарушување на гастроинтестиналниот систем, панкреатит, може да се појави нарушување на жлездите со ендокрино лачење, на функцијата на тироидната жлезда. Оние што во минатото имале анорексија, па ја излечиле, се кандидати за остеопороза. Може да дојде и до оштетување на срцевиот мускул. Кога родителите ќе ги забележат првите знаци, треба да се посети психијатар. Ако дојде до органско нарушување и до нарушување на рамнотежата на хормоните, ако се загубат три последователни менструални циклуси, мора да се оди на лекар. Најтешките случаи завршуваат со хоспитализација со вметнување сонди за исхрана, системи со електролити. Пациентот може да падне во длабока депресија, дури да има и суицидни тенденции, да помине и во некоја психотична декомпензација. Ако заболувањето е на почеток, анксиозноста и несоницата се лекуваат со антидепресиви кои се употребуваат и за стабилизација на апетитот. Во следната фаза, ако дојде до хоспитализација, потребна е соработка од интернистички и од психијатриски тим. Треба да се воспостави нормална исхрана. Се почнува со нискокалорична храна која постепено се зголемува. Откако ќе почнат да јадат нормално, следува зголемување на тежината. На крај, се работи психијатриски – на променетата перцепција на несигурноста. Обично, тоа се преамбициозни, егоцентрични личности кои се интровертни, свртени кон себе.
Има ли случаи на возрасни кои заболуваат од анорексија или од булимија?
НАЈДОСКА: Кај анорексијата на еден маж, девет жени заболуваат од анорексија. Најбројна популација е онаа од 13 до 23 години.Кулминацијата се случува на 17-годишна возраст. Но, ова не значи дека нема отстапки. Ако има отстапки кај децата, тоа се од 10 до 13 години и тогаш доаѓа до запирање на растот и на развојот на телото. Дури и по средување на анорексијата, кај овие пациенти останува заостанувањето на менструалните циклуси. Истражувањата покажуваат дека анорексија може да има и до менопауза. Кај адолесцентите анорексијата е на трето место од хроничните заболувања. Ако не се лекува, морталитетот е од пет до десет проценти. Кај булимијата, кај мажите најмногу страдаат пациенти од 15 до 30 години, но тоа на значи дека нема отстапки.
Лекарите велат дека девојчиња си ги оштетуваат органите за да добијат манекенска става. Зошто е тоа така?
НАЈДОСКА: Кај девојчињата има намерно гладување сè со цел да се постигне таа идеална тежина. Но, овие пациенти никогаш не се задоволни од својот изглед. Нивните критериуми стануваат се построги, додека не дојде до физичка исцрпеност и до органски оштетувања.
Колкав е бројот пациенти што боледуваат од анорексија или од булимија што бараат помош од доктор? Дали тој број е помал од вистинскиот број и зошто ретко се решаваат на помош од стручно лице?
НАЈДОСКА: Во Македонија нема статистички податоци за тоа колкумина страдаат од овие заболувања. Кај анорексијата може да имаме еден налет и целосно излекување. Постојат и случаи каде што има ремисија во текот на болеста, подобрување и релапси, пак запаѓање во анорексични епизоди. Кај одреден процент болеста е хронична, се провлекува во текот на целиот живот.
Дали се лекуваат овие заболувања?
НАЈДОСКА: Кај 20 отсто од пациентите се лекува само првиот напад. Кај 60 проценти од болните се враќаат на нормално функционирање со чести емисии, релапси, но се постигнува функционалност, се лекуваат. Следењето треба да биде подолго токму поради тие ремисии, кога пациентот се чувствува најдобро и затоа треба психијатриски да се следи и до пет години. За жал, кај 20 отсто од пациентите и покрај сета пружена помош лекувањето не е успешно и кај пет до десет проценти завршува со смрт.
Разговараше: Александра М. Бундалевска
Фото: Александар Ивановски
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.