Евролига ТОП 16 – ЦСКА го доби првото место, Фенер турското дерби (видео)

Завршија два натпревари од 11. коло од ТОП 16 фазата во кошаркарската Евролига.

Во првиот натпревар вечерва, ЦСКА Москва на домашен терен ја совлада екипата на Лаборал Куча со резултат 90-78.

Со оваа победа ЦСКА повторно се врати на првата позиција на табелата од група „Ф“ во Евролигата по директниот дуел со шпанската екипа, со која пред овој натпревар го делеа првото место.

Исто така треба да се напомене дека ЦСКА со оваа победа сега има и предност во меѓусебните дуели со Лаборал, бидејќи шпанската екипа на свој терен славеше со 10 разлика, односно два поени помалку од вечерашниот пораз во Москва.

Во победничкиот тим најефикасен играч беше Де Коло со 19 поени, еден помалку даде Хигинс, а Ворончевиќ и Теодосиќ постигнаа по 17 поени.

Кај Лаборал најпрецизен беше Ханг со 19 поени, а покрај него двоцифрен број на поени постигнаа уште и Козер со 11 и Бурусис и Адамс со по 10 поени.

Во вториот натпревар Фенербахче беше подобар во турското дерби во групата „Е“ против Дарушафака со резултат 77-69 и покрај тоа што тимот на Обрадовиќ уште од претходното коло имаше обезбедено пласман во следната фаза – 1/4-финале.

Фенербахче ја остварија 10. победа во оваа фаза од натпреварувањето, со која дополнително се зацврсти на лидерската позија на табелата, додека Дарушафака останува со три победи засега и само теоретски шанси за пласман во четвртфиналето.

Фенер во поголемиот дел од натпреварот беше во водство, противникот само во третата четвртина на кратко го превзема водството, но немаше сила да го задржи и да направи нешто повеќе против фаворитот.

Во победничкиот тим најефикасни беа Екпе Јудо со 18 и Луиџи Датоме со 14 поени. Перо Антиќ се уште не настапува поради повреда.

Кај поразениот Дарушафака двоцифрен број на поени имаа Реџи Рединг со 12, Влбекин со 11 и Јагмур со 10 поени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.