НБА завршница во Барселона, ПАО немоќен во Белград (видео)

Вечерва се одиграа четири натпревари од 10. коло од ТОП 16 фазата во кошаркарската Евролига. Најинтересни и крајно неизвесни беа натпреварите во Барселона и Белград.

Американецот Џастин Долман повторно беше херојот на Барселона – во денешниот натпревар за девет секунди постигна 5 поени и им донесе триумф на Каталонците во дополнителните 5 минути против ЦСКА Москва.

Кошаркарите на ЦСКА Москва беа на чекор од 1/4-финале во Евролигата, но во самиот финиш ја „прокоцкаа“ победата.  Домашната Барселона во „Блауграна“ славеше во продолжението со 100-98 (21-24, 26-14, 13-26, 25-21, 15-13).

ЦСКА Москва ја испушти шансата да го реши победникот уште во регуларниот дел од натпреварот и им овозможи на домашните кошаркари во продолжението да се изборат за триумф.

Во последната акција Долман со тројка од осум метри го израмни резултатот на 98:98, а веднаш потоа пресече додавање на Милош Теодосиќ и поентираше за победа на домаќинот од 2 поени разлика.

Кај Барселона најефикасни играчи беа Анте Томиќ со 21 поен и 6 скокови и Томаш Саторански со 19 поени и 6 скокови.

Најефикасни во гостинскиот тим беа Нандо Де Коло со 30 поени, 7 скокови и 3 асистенци, додека трагичарот Милош Теодосиќ постигна 23 поени, 7 скокови и 6 асистенции.

Кошаркарите на Црвена Звезда Телеком ја остварија шестата победа во рамките на 10. коло од ТОП 16 фазата во кошаркарската Евролига. Во преполната „Комбанк Арена“ го совладаа Панатинаикос со 69-67 (10-18, 18-13, 25-11, 16-25).

Со оваа победа „црвено-белите“ се вратија на третото место на табелата со оглед на подобриот скор во меѓусебните дуели со грчкиот вицешампион.

Најефикасен кај домашната екипа беше Американецот Теренс Кинси со 19 поени, 4 скокови и 3 украдени топки, а одлична поддршка имаше од Квинси Милер кој постигна 16 поени и 5 скокови.

Кај гостите најдобри поединци беа Елиот Вилијамс со 17 поени и Мирослав Радулјица со 11 поени и 7 скокови.

Резултати од денешните натпревари во ТОП 16 фазата во кошаркарската Евролига:

Жалгирис Каунас – Реал Мадрид  75-90
Дарусафака – Анадолу Ефес  68-72
Црвена Звезда – Панатинаикос  69-67
Барселона – ЦСКА Москва  100-98

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.