-Основното јавно обвинителство – Скопје ги прибира информациите за расветлување на смртта на девојката во Аеродром, која почина откако падна од висококатница. Се очекува доставување на комплетните податоци од страна на МВР на РМ – СВР Скопје од делот на спроведените полициски истраги и прибраните известувања од сите граѓани што имале сознанија за овој настан, а со кои претходниот ден беше извршен информативен разговор, како и од тие разговори што дополнително ќе бидат спроведени во МВР на РМ во делот на предистражната постапка – велат од ОЈО за случајот со девојката што падна од деветти кат во скопски Аеродром.
Според нив, во текот на вчерашниот ден биле обезбедени материјални траги и од такси-возилото во кое била покојната ноќта пред нејзината смрт, кои по дадена наредба на ОЈО Скопје ќе бидат предмет на обработка од Одделот за криминалистичка техника при МВР на РМ со цел утврдување траги со идентификациско значење – ДНК.
-Овој чекор е преземен во насока на откривање и обезбедување материјални докази за постоење на евентуално кривичното дело и обезбедување траги што потекнуваат од предметниот настан, а кои ќе може да се користат како материјални докази во текот на постапката – велат од ОЈО.
Исто така, се очекуваат комплетните резултати од Институтот на судска медицина и медицинска деонтологија при Медицинскиот факултет, кои постапуваат по дадени наредби од страна на ОЈО Скопје.
-По прибирање на сите потребни известувања, доколку за настанот се утврди постоење на основи на сомнение за сторено кривично дело, ОЈО Скопје ќе ги преземе сите други потребни истражни дејства заради разјаснување на целиот настан, со цел утврдување на сите околности и обезбедување докази во кривичната постапка – додаваат од Обвинителството.
Во интерес на водење на предистражната постапка во овој предмет, потребно е во јавноста да не се изнесуваат непроверени информации и шпекулации од која било страна, а ОЈО Скопје по утврдувањето на нови релеванти околности, ќе ја информира дополнително јавноста до тој степен до кој тоа го дозволува принципот на тајност на предистражната постапка во согласност со членот 289 од ЗКП.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
