Македонецот Виктор Груев веќе осум години е професор на Универзитетот „Вашингтон“ во Сент Луис, Мисури во САД каде што предава два предмета: дигитална електроника и видеокамери за медицинска примена. Охриѓанецот Груев во САД живее речиси 25 години. Уште како гимназијалец дошол во Америка со програмата на размена на ученици и останал да студира и до денес живее таму. Професорот Груев е изумител на специјално дизајнираните очила со кои се гледаат клетките на туморот за време на операцијата. Овој пронајдок е вистинска мала револуција во светската медицина бидејќи овозможува прецизно отстранување само на заболените клетки и зачувување на здравото ткиво.
За неговиот пронајдок прилог објави и телевизискиот канал „Нешенал џиографик“.
Колку време работевте на пронајдокот?
ГРУЕВ: Пред четири-пет години почнав со научна соработка со група врвни научници од полето на морска биологија. Соработката со нив ме одведе на големиот корален гребен на островот Лизард. Таму почнавме со подморски истражувања за да дознаеме што повеќе за скриениот свет на гребенот, кој полека исчезнува пред нашите очи поради глобалното затоплување. Во рамки на тие истражувања дојдов до нови сознанија за тоа дека разни животни можат да видат повеќе визуелни информации отколку најсовремените камери, кои имаат врвна технологија. Едноставно, природата на еволутивен начин има дојдено до оптимално решение и спроведување на детектор, наноструктури и други оптички елементи во очите на овие животни. Најмногу ме фасцинираа малите морски ракчиња. Овие животни имаат еден од најсофистицираните визуелни системи во животинскиот свет. Имаат повеќе од 16 фоторецептори за боја. Во споредба со нашиот визуелен систем, кој користи три рецептори, нивниот визуелен систем може да разликува мали нијанси на црвена или друга боја, кои за нас немаат разлика. Една дополнителна димензија во нивниот визуелен систем е и тоа што можат да дискриминираат поларизација на светлина. Едноставно кажано, овие животни имаат четири чифта очила за поларизација, кои ги користат за комуникација меѓу себе. Така почнав со развој на нови камери што можат да ја „видат” поларизацијата на светлината и овие сензори го копираат дизајнот што природата го довела до оптимум со милиони години еволуција. Користиме разни наноматеријали за да се направат овие сенозри. Кога ги направивме овие нови видеокамери со тимот што го сочинуваа моите студенти на докторски науки, почнав потрага по нови примени во медицината. И тука почна едно ново и многу интересно откритие. Овие сензори ни овозможија да ги диференцираме канцерогените клетки од здравите, да ги проучиме механичките структури кај лигаментите и тетивите и друга примена. На пример, со мојата камера за поларизација може да се предвиди кога Ахилова тетива може да се скине. Овие научни истражувања ги објавивме минатата година во главното издание на Институтот за инженери по електротехника и електроника, „Просидингс оф д ИЕЕЕ“ (Proceedings of the IEEE). Во рок од една недела повеќе од еден милион луѓе имаа коментирано за овој напис низ цел свет. Едноставно, овие откритија станаа достапни на социјалните мрежи. Поради влијанието што го има овој труд во науката, добив награда за најдобар напис на Институтот за инженери по електротехника и електроника. Таа награда ќе ми биде доделена во Монтреал, Канада, во мај годинава.
Како овие камери ќе им помогнат на хирурзите?
ГРУЕВ: За да можеме да ги диференцираме здравите од канцерогените клетки, користиме една многу основно својство на светлината – тоа е поларизација. Поларизација на светлината, што ние не можеме да ја видиме со нашите очи, е клучна за овие испитувања. Кога светлината ќе се одбие од даденото ткиво, светлината се поларизира. Степенот на поларизација е показател за тоа колку е здраво тоа ткиво. Ако тоа ткиво е канцерогено, прекршената светлина ќе биде поинаква отколку кај здравото ткиво. Ова овозможува да се разликува здравото ткиво од ткивото заразено од канцер.
Дали веќе работите на некој нов пронајдок?
ГРУЕВ: Секој ден е исполнет со нови сознанија и предизвици. Во моментов имам осум студенти на докторски студии и секој има посебна тема на истражување. Работам на развој на сензори што ќе овозможат откривање на нервни активности во мозокот на животни без да користиме токсичен флуоресцентен маркер. Потоа на нови ендоскопски инструменти, кои ќе овозможат препознавање тумори и нерви истовремено. Тоа се микроскопски инструменти, кои ќе се користат при операции на мозочни тумори. Работам и на камери за подводни истражувања, потоа за подобрување на плодноста на житото и друго.
Како ја гледате иднината на науката?
ГРУЕВ: За мене, наука е неразделив дел од живот. Ни овозможува да имаме подобар и подолг живот, да живееме поквалитетно, да можеме да комуницираме со секого во секое време. Многу е важно да се инвестира во наука. Тоа не значи само инвестиција во научни проекти, туку инвестиција во целата едукација од најрана возраст. Многу е важно да се поттикнува младиот свет да размислува надвор од рамките, да биде креативен. Тоа значи колку што се важни природните науки во едукацијата, толку е важна и литературата, општествените науки. Само тогаш ќе имаме револуционерни откритија во науката.
Неколку пати имавте и предавање во Скопје и во Охрид. Имаше ли заинтересираност и како поминаа предавањата?
ГРУЕВ: Имаше голема заинтересираност и почнав неколку соработки со Македонија. Голем број млади студенти контактираа со мене за совети за студии надвор и за продолжување со нивната едукација. Се надевам дека дел од моите излагања ги мотивираа младите за научни испитувања. Да се корегиран, науката не е професија – науката е пасија. И тоа заразна пасија и се надевам дека публиката имаше можност да ја почувствува.
Дали Вашите идни планови се поврзани со Македонија?
ГРУЕВ: Често размислувам како може да се донесе оваа технологија и истражувања во Македонија. Се надевам дека еден ден ќе имаме научен центар во Македонија, кој ќе овозможи интернационални соработки и во кој јас би учествувал активно. Од страна на медицинските истражувања, сакам што поскоро да се донесе оваа технологија во Македонија. Потребна е поддршка од Владата, како и блиска соработка со факултетите и со Клиничкиот центар за да може да формираме единствена група на истражување. Се разбира, кога мојата технологија ќе се комерцијализира, сакам Македонија да биде една од првите држави во кои ќе се применува и да служи како референтен центар за други места.
Разговараше: Александра М. Бундалевска
Фото: приватна архива
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Поврзани вести
-
Шок во Бордо: Суботиќ во бесознание, доби удар од голманот на Ст.Етјен
-
Кузмановска: Неспособната власт ги задолжи граѓаните за нови 21,1 милион евра
-
И јас трпев насилство од поранешниот партнер: Министерката си ја отвори душата!(видео)
-
Руси масовно дрифтаат во снег, ни полицијата не им може ништо (Видео)