Во Премиер лигата денес се одиграа последните два натпревари од 29. коло.
После две врзани првенствени победи над Арсенал и Вотфорд, Манчестер Јунајтед повторно загуби и разочара на гостувањето во Бирминген кај Вест Бромвич Албион.
ВБА победи со минимален резултат, а единствениот стрелец на натпреварот беше Венецуалецот Саломон Рондон во 66. минута.
Домаќинот беше подобар противник од самиот почеток, тимот на Луис Ван Гал делуваше некоординирано, а работите дополнително ги искомпликува исклучувањето на Хуан Мата во 26. минута од натпреварот. Шпанецот во период од три минути заработи два жолти картони.
Вест Бромвич со оваа победа, трета во последните четири кола, се искачи на 11. место на табелата, додека „црвените ѓаволи“ паднаа за едно место и сега се на шестата позиција.
Во првиот натпревар денес Ливерпул успеа да се извади на гостувањето кај Кристал Палас и со пресврт дојде до победа од 2-1.
Јирген Клоп пред дуелот со Манчестер Јунајтед во Лига на Европа, одлучи да ги одмори Кутињо и Стариџ, а шанса во првиот тим добија Ориги и Лалана.
Лошо започна натпреварот за Ливерпул, првото полувреме заврши без голови, а на самиот почеток од вториот дел, во 48. минута Ледли погоди за предност на домашниот тим од 1-0. 15 минути подоцна „црвените“ останаа со играч помалку откако Џејмс Милнер го заработи вториот жолт картон.
Делуваше дека Ливерпул тешко ќе дојде и до бод, но во 72. минута тркалото се сврте и работите почнаа да се влошуваат за домашниот тим, откако голманот Мекарти направи катастрофална грешка, неспретно ја исфрли топката која стигна до Фирмини кому не му беше тешко од 15-тина метри да го погоди празниот гол.
Во финишот од натпреварот судиското продолжение траеше долго и дури во 96. минута беше досуден пенал за Ливерпул, а Бентеке не погреши од белата точка и му донесе голема победа на Ливерпул.
Но сепак, овој пенал за многумина беше спорен и ќе се збори уште некое време на островот, бидејќи Дилејни случајно се лизна и го закачи Бентеке, а судијата немаше да погреши и ако не покажеше на белата точка. Проценете сами…
Ливерпул сега е осми на табелата со 44 бодови, а Кристал Палас во долниот дел на 15. место со 33 бодови.
Табела:
Лестер 60,
Тотенхем 55,
Арсенал 52,
Манчестер Сити 50,
Вест Хем 49,
Манчестер Јунајтед 47,
Ливерпул 44,
Стоук 43 …
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
