Во НБА ништо ново, Голден Стејт продолжува да доминира, нов рекорд на Кари (видео)

Актуелниот шампион во НБА лигата, Голден Стејт Вориорс стигна до 51. победа во сезоната откако ноќеска славеше на гостувањето кај Мајами Хит со 118-112.
Со новата 51.победа Стеф Кари и другарите се се поблиску до рекордот на Чикаго од пред точно 20 години кога имаа скор од 72 победи и само 10 порази.
До крајот на регуларниот дел од сезоната остануваат уште 26 натпревари и секако екипата од Оукленд ќе се обиде да влезе во историјата во сезоната која е најдобра за овој тим од неговото постоење.
Најголема заслуга за новата победа на гостувањето кај Мајами имаат Кари и Томпсон кој заедно реализираа 75 поени.
Кари беше стрелец на 42, но позначајно е што го израмни НБА-рекордот на Кајл Корвер за најмногу натпревари во низа во кои постигнал најмалку една тројка. Ова беше вкупно 127. меч во серија во кој Кари погоди од далечина, за тоа му беа потребни само 78 секунди, а извонредниот бек ќе има можност целосно да го урне рекордот на Корвер веќе вечерва, на новото гостување на Флорида, овојпат против тимот на Орландо меџик.

Лос Анџелес клиперс неочекувано загуби на домашен терен од Денвер со 81-87. Денвер ја забележа својата прва победа по олстар викендот најмногу поради непотребното форсирање на шутеви од далечина на домаќините, кои упатија дури 46 обиди за тројка (прецизни беа само 13 пати).

Кошаркарите на Сан Антонио рутински ја одработеа задачата на гостувањето во Сакраменто, триумфирајќи со убедливи 92-108. Олдриџ постигна само седум поени, а Данкан воопшто не се запиша меѓу стрелците, но затоа во ритам беа Паркер (23 поени), Леонард (18) и Грин (16 поени), кои со помошта на останатите соиграчи не му оставија на домаќинот ниту најмала шанса да се радува на победата на оваа средба.

Резултати НБА:

Мајами – Голден стејт 112-118, Кливленд – Шарлот 114-103, Индијана – Њујорк 108-105, Детроит – Филаделфија 111-91, Торонто – Минесота 114-105, Чикаго – Вашингтон 109-104, Мемфис – ЛА лејкерс 128-119, Далас – Оклахома сити 103-116, ЛА клиперс – Денвер 81-87, Сакраменто – Сан Антонио 92-108.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.