Кастратовиќ: Атмосферата е одлична, подготвени сме да ја прославиме првата победа над Будуќност (видео)

По серијата од две победи, против Савехоф и потоа во гости против ЦСМ Букурешт, ЖРК Вардар во добра атмосфера во го пречекува Будуќност во последниот натпревар на домашен терен од главната фаза во Лигата на шампионите. „Вардарки“ се подготвени да ја продолжат победничката серија и да му се реваншираат на актуелниот европски првак за оној тежок пораз на гостувањето во Подгорица. Време е Вардар да ја надмине психолошката бареира и фамата од Будуќност која трае веќе подогло време, а сега е вистинскиот момент за тоа најавуваат од македонскиот шампион.

– Ова е натпревар од исклучително големо значење за нас како екипа, не само затоа што доаѓа европскиот шампион, туку затоа што би требало првпат да го победиме Будуќност, за да ја поминеме таа психолошка бариера која трае подолго време. Многу добро работиме, девојките се посветени на овој меч. Со Букурешт одигравме многу добро и се надевам дека тоа ќе го пренесеме в недела. Будуќност е една екипа со одлична одбрана која прима многу малку голови, ако постигнеме повеќе од 22 гола мислам дека ќе ја имаме победата. Ја повикувам публиката да дојде во што поголем број и да ни помогне да ја надминеме таа психолошка и физичка пречка и да го добиеме Будуќност – изјави Индира Кастратовиќ.

На две кола до крајот на сезоната Вардар е трет на табелата, со 10 бода, три помалку од лидерот Будуќност. Меѓу нив е Ѓер со 11 бода и токму тоа е цел на која реално може да се нишани до крајот на главнава фаза. Новиот судир меѓу старите ривали ќе се случи во „Јане Сандански“, в недела од 17:30.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.