Клиперс славеа во дербито на западот, Роуз не можеше сам против разиграните Кливленд (видео)

По паузата за ол-стар викендот кој се одигра изминатиот викенд во Торонто, продолжија натпреварите од регуларниот дел од сезоната во НБА лигата.
Во дерби пресметката на западната конференција ЛА Клиперс зачудувачки лесно славеше над вториот тим на западот Сан Антонио со 105-86.
„Мамузите“ го доживеаа првиот пораз по пет победи, а клучен период беше во третата четвртина кога Клиперс ја направи клучната разлика од 20 поени.
Најефикасен кошаркар во победничкиот табор беше Крис Пол кој заврши со дабл-дабл учинок од 28 поени и 12 асистенции, а го следеше Крафорд со 19 поени, додека кај Сан Антонио кој немаше своја шутерска ноќ и воедно беше без повредениот Кави Ленард, Тони Паркер постигна 14 поени.

Кливленд рутински ја заврши задачата против Чикаго, триумфирајќи со 106-95 во првиот меч откако финалистите од минатата сезона решија да го „трејдуваат“ Андерсон Варежао во размената со која го добија Ченинг Фрај од Орландо.

– Тоа е најлошиот дел од оваа професија. Кога ќе загубиш соиграч, како да губиш брат бидејќи овде делиме и добро и зло – изјави Леброн Џејмс, кому Варежано му беше еден од најдобрите пријатели уште од почетоците на НБА-кариерата во Кливленд.
Леброн го заврши синоќешниот натпревар со 25 поени, 9 скока и 9 асистенции, а добар меч одиграа и Кевин Лав, кој реализираше дабл дабл од 15 поени и 15 скокови и Кајри Ирвинг со 19 поени.
Во Чикаго најрасполежен беше ол-стар бекот Дерик Роуз со 28 поени и седум скока.

НБА резултати:

Вашингтон – Јута 103-89, Кливленд – Чикаго 106-95, ЛА клиперс – Сан Антонио 105-86.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.