Турски компании од областа на енергетиката и минералните суровини се заинтерсирани за инвестирање во Македонија. Интересот го покажаа на средбата со министерот за економија Ваљон Сараќини денеска во Истанбул, каде што пред стопанственици од Стопанската комора на овој град ги претстави можностите и условите за инвестирање во Македонија.
Министерот Сарачини им ги претстави условите за инвестирање во технолошко-индустриските зони во Македонија и бенефитите, како и потенцијалите за инвестирање во секторите енергетика и минерални суровини, особено металните минерални суровини, бакар, злато, сребро, олово, цинк, манган, железо, како и локациите и можните наоѓалишта во Македонија.
– Промоција на условите и на предностите за инвестирање во Македонија пред турските бизнисмени беше една од главните цели на оваа посета. Претставниците на турските компании од Истанбул покажаа голем интерес за условите за инвестирање во зоните, а како дополнителен адут го сметаат полесниот пристап до пазарите во регионот од Македонија. Очекуваме набрзо и дел од најавите да се конкретизираат – изјави министерот Сарачини по средбата со бизнисмените во Истанбул.
Претставниците на турските компании од Истанбул најголем интерес пројавиле за можностите што ги нудат ТИРЗ во земјава, за што е најавено продолжување на контактите во оваа насока, како и посета на делегација составена од претставници на Комората на земјава.
Република Македонија и Република Турција имаат добра соработка во областа на економијата, но на средбата беше констатирано дека постојат услови и можности за интензивирање на соработката особено во делот на нови инвестиции и зголемување на соработката меѓу компаниите од двете земји.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
