Објектот „Стар Метропол“, во центарот на Скопје, не само што ќе има барокна фасада, туку ќе претрпи и доградба. Според Предлог одлуката за изменување и дополнување на Одлуката за утврдување на фасади, поднесена од градоначалникот на Град Скопје Коце Трајановски, измената ја побарал сопственикот на објектот. Во образложението од Градот се посочува дека промените во изгледот на фасадата се како резултат на целокупната планирана реконструкција на објектот, промена на конструктивните системи и негова доградба и надградба.
-Се предлага изменување и дополнување на Одлуката за утврдување изглед на фасади на објекти во централното градско јадро на подрачјето на градот Скопје (Службен гласник на Град Скопје бр.3/14) од причина што Идејниот проект со тех.бр. 07-122/14 кој е наведен во член 1 точка 14 од Одлуката, а се однесува на деловниот објект Стар Метропол, изработен од КВАДАР доо Скопје, се менува со нов проект – фаза Архитектура. Град Скопје, прими проект – фаза Архитектура од страна на сопственикот на објектот со барање измена на изгледот на фасадата на објектот на Стар Метропол. Имено во истиот е опфатена доградба и надградба на објектот според насоките и параметрите од Деталниот Урбанистички план Мал Ринг Скопје. Проект – фаза Архитектура кој се предлага за составен дел од Одлуката е нарачан од страна на Канет Адем дооел, Скопје и истиот со барање за утврдување на изгледот на фасадата на објектот од страна на Совет на град Скопје е поднесен во Град Скопје, се наведува во образложениетот од Градот.
За новата фасада и доградна на објектот „Стар Метропол“, советниците од Советот на Град Скопје ќе расправаат овој четврток.
Во меѓувреме објектот „Сити галери “ кој е во продолжение на „Стар Метропол”, веќе на големо се реконструира со барокна фасада.
Нови барокни ќе добијат и девет објекти на улицата „Македонија”, еден на улицата „Димитрие Чуповски” односно објектот на Стопанската комора на Македонија и два објекти на улицата „Даме Груев”. Идејните решенија се избрани а во тек е подготвка на основните проекти.
-За предложените фасади во тек е изготвување на основни прокекти откако е претходно спроведен конкурс за избори на идејни архитетонски решенија. Во конкурсната комисија активно учество земаа сопственици на станбените делови и деловните простории, а при изработката на основните проекти се земаат во предвид сите барања и потреби на сопствениците чии фасади се предмет на реконструкција, се наведува во образложението на град Скопје.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
