Наполи на колена пред „старата дама“, Јувентус е на врвот во Серија А (видео)

Екипата на Јувентус славеше минимална но заслужена победа од 1-0 над Наполи во големото дерби одиграно во Торино и со тоа се искачи на врвот на табелата во Серија А лигата.

„Резервистот“ Симоне Заза повторно ја имаше улогата на херој на „старата дама“, која и покрај очајниот старт на сезоната, по 25 одиграни кола се искачи на врвот на табелата, јасно демонстрирајќи ја својата намера за освојување на ново скудето.
Триумфот над Наполи е 15. во низа за избраниците на Масимилијано Алегри, кои истовремено ја прекинаа и серијата од осум победи на „наполитанците“ во пресрет на вечерашното дерби. Дуелот во Торино мина во израмнета игра во која и двата тима многу повеќе внимаваа на сопствениот отколку што напаѓаа кон противничкиот гол.

Сепак тренерот Масимилиано Алегри на „старата дама“ направи вистински потег со внесување во игра на џокерот Заза кој го замени индиспонираниот Мората, а италијанскиот репреентативец се покажа во вистинско светло постигнувајќи го единствениот погодок во самиот финиш од мечот.
Тој одлично прими топка на 25 метри од противничкиот гол, со првиот допир се ослободи од Кулибали, а потоа силно шутираше со левата нога, топката малку го удри Албиол и го измами Реина, завршувајќи во мрежата на „наполитанците“ за огромна радост на Јувентус и сите приврзаници на најтрофејниот италијански клуб.

Јуве со оваа победа сега има 57 бода, еден повеќе од Наполи, додека Рома на третата позициј има 47 бода на своето салдо.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.