Зидан: Роналдо нема да си замине од Реал додека сум јас тренер

Зинедин Зидан јасно стави до знаење дека планира својот Реал Мадрид да го гради околу Кристијано Роналдо, во обид да ги запре шпекулациите за заминувањето на Португалецот од „Сантијаго Бернабеу“. Роналдо беше незадоволен од изборот на Бенитез за тренер и играше далеку под своите стандарди за сега веќе поранешниот стратег, но Зидан верува дека ќе успее повторно да го извлече најдоброто од најголемата ѕвезда на Реал Мадрид.

– Дека нема шанси за трансфер, тоа е преблага изјава. Роналдо е душата на Реал, додека сум јас тренер, тој дефинитивно нема да си замине од клубот. Не верувам дека можам да го научам премногу, но сигурно ќе му ја овозможам слободата во играта. Се што сака Кристијано е да се чувствува сакан и почитуван, тогаш го дава најдоброто од себе на теренот – изјави Зидан, кој имаше можност да соработува со Португалецот како помошник на Карло Анчелоти.

Воедно, новиот тренер на Реал Мадрид објави дека клубот нема намера во јануари да ги продава Иско, Хесе или Черишев, за кои се шпекулираше дека би можеле наскоро да ги сменат клупските бои.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.