Сан Антонио и без Данкан стигна до 18.победа во низа на домашен терен (видео)

Сан Антонио спарс ја забележа и 18. победа во низа на домашен терен, овојпат над Минесота со 101-95, а во главна улога на овој меч сосема неочекувано се најде Бобан Марјановиќ. Тренерот Попович реши да му даде заслужен одмор на ветеранот Тим Данкан, што само по себе значеше шанса за Марјановиќ, можност за докажување што „српскиот џин“ немаше намера да ја пропушти. Имено, центарот на Сан Антонио го заврши натпреварот со 17 поени за 14 минути игра, и тоа со стопроцентен шут од поле (7/7).

– Тој е толку голем. Мислам дека моите играчи одиграа добро во одбраната, беа доволно агресивни во дуелите, но тој е премногу голем за да може да биде запрен кога ќе влезе во ритам – изјави привремениот тренер на Минесота, Сем Мичел.

Шампионот Голден стејт во 30. меч сезонава ја забележа својата 29. победа, славејќи над Сакраменто кингс со 122-103. Стеф Кари одигра одличен меч забележувајќи трипл-дабл од 23 поени, 14 скока и 10 асистенции, а најефикасен кај актуелниот првак беше Клеј Томпсон со 29 поени.

Кливленд многу потешко од очекувањата триумфираше во Феникс, тимот кој се наоѓа во голема криза и каде се очекува во најскоро време отказ да добие тренерот Хорначек. Кавси победија со 97-101, најефикасен беше Ирвинг со 22 поени, додека Леброн Џејмс реализираше само 14 поени на оваа средба.

НБА резултати:

Шарлот – ЛА лејкерс 108-98, Мајами – Бруклин 105-111, Орландо – Њу Орлеанс 104-89, Индијана – Атланта 93-87, Сан Антонио – Минесота 101-95, Феникс – Кливленд 97-101, Јута – Филаделфија 95-91, Далас – Милвоки 103-93, Чикаго – Торонто 104-97, Вашингтон – ЛА клиперс 91-108, Голден стејт – Сакраменто 122-103.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.