По божиќните празници Кливленд со втор пораз во низа, Портланд го понижи вицешампионот (видео)

Синоќа во НБА лигата имаше богата понуда од 13 натпревари.

Екипата на Портланд која игра очајна сезона со само 12 победи досега, ја прекина серијата од пет порази токму против вицешампионот Кливленд декласирајќи го со 29 поени разлика (105-76). Ова е втор пораз во низа за Леброн Џејмс и другарите по божиќната пауза.
Тренерот Дејвид Блат ги ротираше сите 13 играчи кои ги имаше на располагање и затоа поразот беше неминовен. Леброн Џејмс имаше најголема минута и помина на паркетот 26 минути, а реализираше за него скромни 12 поени. Најефикасен во таборот на Кливленд беше Кевин Лав со еден поен повеќе од „кралот“. Ален Краб беше изненадувањето кај Портланд со 26 поени, што беа најмногу за него во кариерата.

Во одличен натпревар победа славеше Њу Орлеанс против Хјустон од 110-108. Тимот од Тексас имаше и можност за победнички шут во овој меч, но Пеликанс со одлична одбрана не дозволија да им биде украдена победата. Ерик Гордон со 26 и Ентони Дејвис со 24 поени го водеа Њу Орлеанс до победата, додека на спротивната страна Џејмс Харден уфрли 25 поени.

Уште еден интересен меч беше одигран во Солт лејк сити. ЛА Клиперс славеа против Јута со 109-104 со одличен натпревар на Редик кој мечот го заврши со 25 поени. Кај домашните Гордон Хауард постигна 28 поени.

НБА резултати: Шарлот – Мемфис 98-92, Њу Орлеанс – Хјустон 110-108, Орландо – Мајами 101-108, Атланта – Њујорк 117-98, Детроит – Бостон 93-99, Минесота – Индијана 88-102, Далас – Чикаго 118-111, Сан Антонио – Денвер 101-86, Јута – ЛА Клиперс 104-109, Портланд – Кливленд 105-76, Бруклин – Вашингтон 96-111, Милвоки – Торонто 90-111

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.