Во Сан Антонио не се слуша џез, ниту 18 тројки не им помогнаа на Хјустон (видео)

Синоќа на програмата во НБА лигата беа одиграни десет натпревари.

Еден од најинтересните дуели се одигра во Денвер каде што домашната екипа успеа да слави победа над Хјустон со 114-108. Тие успеаја да стигнат до триумфот во самиот финиш од мечот, откако на една минута до крајот успеаја да реализираат четири слободни фрлања. Хјустон беше во негатива и од 14 поени, но Џејмс Харден и другарите ја стигнаа разликата дури имаа и шут за водство, но Тери не реализираше чист шут. Попусто беа 18 тројки за „ракетите“ и се вратија на поразите откако имаа одлична недела со три победи од четири средби.
Вил Бартон со 23 поени беше изненадувањето во тимот на Денвер, а додаде уште девет скока. Кај Хјустон, а воедно и на мечот, прв стрелец беше Харден со 24 поени.

Сан Антонио спарс продолжи со одлични настапи на домашен терен, стигнувајќи до 13. победа во низа со триумфот над Јута од 118-81. „Мамузите“ доминираа од самиот почеток, стигнаа и до позитива од огромни 46 поени разлика, а малото опуштање во самиот финиш им овозможи на „џезерите“ да намалат на 37 поени негатива. Каваи Леонард со 22 поени беше најефикасен кај спарси на овој меч, пред Олдриџ и Паркер со по 18 поени.

Интересно беше и во Детроит, каде што домашниот тим по продолжение од пет минути загуби од ЛА клиперс со минимални 103-105. Џеј Џеј Редик со тројка го одведе мечот во продолжение, а потоа во клучните моменти гостите погодија уште еден шут од далечина, овојпат преку Крофорд, стигнувајќи до голема победа. Блејк Грифин беше главна фигура на натпреварот со 34 поени и 7 асистенции, две од нив при тројките на Рединг и на Крофорд, додека Рединг го одигра својот најдобар меч сезонава, постигнувајќи 24 поени.

НБА-резултати:

Атланта – Мајами 88-100, Индијана – Торонто 106-90, Бруклин – Орландо 82-105, Детроит – ЛА клиперс 103-105 (по прод.), Чикаго – Филаделфија 115-96, Мемфис – Вашингтон 112-95, Далас – Феникс 104-94, Сан Антонио – Јута 118-81, Денвер – Хјустон 114-108, Портланд – Њу Орлеанс 105-101.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.