Продолжува доминацијата на Голден стејт, Бостон потклекна по две продолженија (видео)

Најдобрата екипа во НБА лигата, Голден стејт Вориорс, продолжува да доминира на терените во САД. Синоќа ја оствари најтешката победа од почетокот на сезоната и ја запиша 24.победа. Најновиот триумф мораше да го одбработи по две продолженија за победа над Бостон од 124-119 на гостински терен.
Актуелниот шампион играше без вториот најдобар стрелец, Клеј Томпсон, па покрај Стеф Кари мораше уште еден играч да ја преземе поголема одговорност. Тоа беше Дрејмонд Грин, кој постигна 24 поени, имаше 11 скока, 8 асистенции и 5 блокади. Кари броеше до 38 поени, но со доста лош просек на шутот. Кели Олиник со 28 поени беше најефикасен кај Бостон.

– Ова беше исцрпувачки меч, но навистина интересен. Вакви мечеви не прават уште посилни – истакна Кари по натпреварот.

Кливленд немаше никакви проблеми да го совлада Орландо на гости со 111-76. Леброн Џејмс со 25 поени очекувано беше најефикасен кај Кавалирс, а добар натпревар одигра и повретникот Иман Шамперт со 14 поени.

Денвер, исто така по продолжение, славеше против Минесота со 111-108. Најефикасен во домашниот тим беше Данило Галинари со 23 поени, а Никола Јокиќ заврши со 19 поени, шест скока и четири асистенции.
Кевин Гарнет го запиша синоќа и 11.407 дефанзивен скок во кариерата со што стана апсолутен рекордер.

НБА резултати: Индијана – Мајами 96-83, Орландо – Кливленд 76-111, Филаделфија – Детроит 95-107, Бостон – Голден стејт 119-124, Торонто – Милвоки 90-83, Мемфис – Шарлот 99-123, Њу орлеанс – Вашингтон 107-105, Денвер – Минесота 111-108, Јута – Оклахома 90-94, Феникс – Портланд 96-106, Сан Антонио – ЛА Лејкерс 109-87

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.