Голден стејт со новата победа влезе во историјата (видео)

Актуелниот шампион на лигата на НБА, екипата на Голден стејт, продолжува со одличните партии и во новата сезона. Стеф Кари и другарите со синоќешната победа над Денвер на гостински терен од 118-105 го израмнија рекордот на лигата за најдобар почрток на една сезона од 15 победи по ред. Вакво достигнување досега имале само екипите на Вашингтон во 1948 и Хјустон во 1993 година.
Им останува уште една победа за да се најдат осамени на врвот на листата. Одличен меч имаше Томпсон со 21 поен, два повеќе од главната ѕвезда во тимот Стеф Кари.

– Имаме самодоверба, не се занесуваме, туку искрено веруваме дека нема да загубиме меч во блиска иднина. Тоа е така бидејќи знаеме дека можеме да играме уште подобро – изјави Кари по натпреварот во Денвер.

Слабите игри на ЛА клиперс продолжија и со синоќешниот домашен пораз од Торонто, по што амбициозниот состав на клиперси има негативен резултат (седум победи и осум порази), многу слаб ефект за тимот што беше најавуван како главен ривал на Голден стејт во западната конференција.

Оклахома сити во интересен дуел славеше над Далас со 117-114, запирајќи ја серијата од шест победи на гостинскиот состав. Расел Вестбрук со 31 поен и 11 асистенции беше најзаслужен за оваа победа, во која повторно не учествуваше повредениот Кевин Дурант.

Резултати НБА:

ЛА клиперс – Торонто 80-91, Бруклин – Бостон 111-101, Њу Орлеанс – Феникс 122-116, Оклахома – Далас 117-114, Денвер – Голден стејт 105-118, ЛА лејкерс – Портланд 93-107.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.