Доналд Туск во посета на Македонија

Претседателот на Европскиот совет Доналд Туск денеска ќе престојува во работна посета на Република Македонија.

За време на престојот, Туск ќе има тет-а-тет средба со претседателот Ѓорге Иванов, по што двајцата ќе дадат изјави за медиумите.

Како што соопшти Кабинетот на Иванов, предвиден е и работен ручек на Туск и Иванов и членовите на делегациите.

Причина за итната посета од страна на првиот човек на Европскиот совет, како што објави и Доналд Туск на социјалната мрежа „твитер“, е токму бегалската криза и напливот од мигранти во Европа.

Посетата на Туск следи непосредно по одлуката на одредени земји за ограничување на влезот на бегалците, односно пропуштање само на бегалците од воените конфликти во Авганистан, Сирија и Ирак, а не и на економски мигранти од останатите земји од Блискиот Исток и Африка.

Претседателот на Европскиот совет пред Македонија ќе ги посети и Србија и Албанијa, кои исто така се главна рута на бегалците од воените конфликти.

Бегалската криза и заканите од тероризам беа причината минатата сабота претседателот Иванов да го свика Советот за безбедност.

На седницата беше заклучено АРМ и Управувачкиот комитет да ги преземат сите потребни мерки доколку се промени ситуацијата на теренот, односно во случај на можни ограничувања на протокот на мигранти во другите држави во Европа, кон кои тие се упатуваат, како крајна мерка да се преземе и поставување жичена ограда на границата.

Претходно, Иванов изјави дека во Македонија нема да се градат бегалски кампови и дека земјата има капацитет привремено да згрижи 2.000 бегалци.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.