Во Македонскиот народен театар (МНТ) вечерва ќе се одржи балетска премиера на „Балкан денс проџект вол.1“, современа балетска претстава во кореографија на Александар Илиќ од Србија и Игор Киров од Македонија.
Настапуваат Мојца Мајцен од Словенија, Адријана Данчевска од Македонија, Катерина Стојковиќ, Миона Петровиќ и Теодора Сујиќ од Србија.
Музиката е на Дуке Бојаџиев, Кирил Џајковски, Баета Вискера -Петротин, Василие Ѓоковиќ, а сценографијата на Дуња Костиќ.
Проектот е во соработка со фестивалот „Велење“, Словенија.
„Балкан денс проџект“ е интернационална танцова продукција која ги обединува младите надежни кореографи, танчери и музички уметници од Македонија, Србија, Словенија и Хрватска.
Низ своите приказни, овие уметници го споделуваат индивидуализмот и во исто време истражуваат нови искуства за животот на балканските простори.
Со овој проект се соединуваат новата генерација уметници од балканскиот регион и се охрабруваат да соработуваат и да работат на интеграција споделувајќи го сличното културно наследство, да ја поттикнат креативноста, како и да ги раздвижат уметниците и културните работници, да го промовираат вкрстениот културен дијалог низ јазикот на уметноста.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
