Портрет на Велко Неделковски утре во ДПМ

Утре (среда, 21 октомври), во 12 часот, во Друштвото на писателите на Македонија ќе биде претставен творечкиот портрет на истакнатиот македонски писател Велко Неделковски. Средбата ќе ја отвори Стојан Тарапуза, координатор на Клубот на писателите за деца „Ванчо Николески“ при ДПМ, а за творештвото на Неделковски ќе зборуваат Александар Поповски и Мите Спасевски. Фрагменти од творештвото на писателот ќе чита Александра Велинова.

Богатиот и разновиден творечки опус на Велко Неделковски го сочинуваат 34 книги од сите жанрови. Добитник е на низа награди за романи, раскази, радио и телевизиски драми и серии. Во 1986 година ја доби наградата за најдобра книга за деца на Струшките вечери на поезијата. Со романот „Збунети години“ Неделковски е застапен во антологиската едиција 135 тома македонска книжевност.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.