Кој ќе ја добие Нобеловата награда за мир: Меркел, папата Франциск или УНХЦР?

Пред официјалното доделување на Нобеловата награда за мир, некои светски медиуми веќе нагаѓаат кои се главните фаворити, а освен Ангела Меркел, аналитичарите сметаат дека и папата Франциск е голем фаворит, пишува „МКД“.

Од Институтот за мировни студии во Осло, кој ја составува листата на кандидатите, истакнаа дека оваа година Нобеловата награда за мир може да му се додели на некој што е активно вклучен во решавањето на бегалската криза. Тоа е причината зошто многу луѓе веруваат дека тоа ќе биде Ангела Меркел.

Од друга страна, постојат навестувања дека наградата би можела да ја добие и УНХЦР, агенцијата на ОН што се грижи за бегалците. Тие се меѓу главните кандидати поради активностите што ги преземаат во решавањето на една од најголемите бегалски кризи во модерната историја.Меркел им дозволи на сириските бегалци да влегуваат во Германија, а се очекува дека до крајот на оваа година земјата ќе прими околу 800 илјади бегалци.

Сепак, меѓу кандидатите за Нобеловата награда за мир се наоѓа и папата Франциск. Папата бил номиниран од членот на норвешкиот парламент Абид Раџа поради неговите активности во борбата за верска слобода и за промоција на социјалната правда.

Оваа година, во конкуренција на Нобеловата награда за мир се 273 кандидати, а прогласувањето на победниците ќе се одржи на 9 октомври во Осло.

„Чест ми е како муслиман да го номинирам папата за Нобеловата награда“, рече Раџа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.