Унгарија го затвори и воздушниот простор над границата со Србија

Унгарија денеска го затвори воздушниот простор во длабочина од 20 километри од својата граница кон Србија, до височина од 1.350 метри, соопшти унгарското Министерство за транспорт.

Ваквата мерка е воведена со цел да се овоможи безбедно користење на овој дел од унгарскиот воздушен простор од страна на полицијата, војската и службите за брза помош при справувањето со бегалската криза, се наведува во соопштението.

Според Министерството, затворањето на воздушниот простор, што ќе биде во сила до следната наредба, нема да влијае врз меѓународниот воздушен сообраќај.

Унгарија денеска ја затвори и границата кон Србија со цел да спречи влез на имигранти на нејзина територија, по што доцна попладнево започна да пропушта бегалци во помали групи преку официјалниот премин на унгарско-српската граница Хоргош 2.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.