Компанијата „Сол хидропауер“ почна изградба на првата од трите планирани мали хидроцентрали на реката Бистрица. Со таа компанија Министерството за економија потпиша четири договори за концесија на вода, на водотекот на Бистрица, и веќе се почнати подготвителни активности за нивна изградба. Реализацијата на инвестицијата е вредна 15 милиони евра.
– Во општина Теарце, овој концесионер ќе изгради 3 мали хидроелектрични централи со вкупен инсталиран капацитет од 7,5 мегавати, со очекувано годишно производство од 28 гигават часови, а големината на инвестицијата би изнесувала 15 милиони евра – рече министерот за економија Ваљон Сараќини.
Според договорите за концесија, концесионерот годишно ќе уплаќа надомест во висина од 2 проценти од остварениот приход од продадената електрична енергија. Од 2016 година, половина од предвидените 2 проценти ќе одат во буџетот на општина Теарце.
Во насока на локалниот и регионалниот развој Министерството за економија потпиша и четири договори за концесија за вода за изградба на четири мали хидроцентрали на река Одранска, со компаниите Супер ноува енерџи ДООЕЛ Тетово и ЕМК Мали хидроелектрани ДООЕЛ Скопје, со вкупен инсталиран капацитет од 3,4 мегавати, очекувано годишно производство од околу 14 гигават часови и инвестиција во износ од 7 милиони евра.
– Со изградбата на овие 7 мали хидроелектрични централи во општина Теарце ќе се инвестираат над 22 милиони евра во наредните 2 до 3 години. Градежните активности во кои спаѓа околу 70 проценти од инвестицијата ќе се реализираат од домашните локални компании, со што ќе заживее локалната економија. Секако, очекуваме и нови вработувања, како во фазата на изградба на малите хидроцентрали, така и во фазата на одржување, кога ќе бидат ставени во функција, најави министерот за економија.
Хисен Хасани, градоначалник на општина Теарце, оцени дека изградбата на хидроцентралата е историски момент за општината и оти првпат се инвестира во проекти со вредност од над 22 милиони евра.
Управителот на фирмата Сол хидропауер Трајче Николов нагласи дека реализацијата на проектот ова е најдобар пример за соработка помеѓу инвеститорот, локалната власт и централната власт.
Од вкупно 70 потпишани договори за концесија за мали хидроелектрични централи, со инсталиран капацитет од 60 мегавати и инвестиција која се проценува на околу 120 милиони евра, досега се изградени 11. Веќе произведуваат електрична енергија и ја предаваат на мрежа. Во изградба се уште 20-тина мали хидроелектрични централи и се очекува да бидат пуштени до крајот на годинава и почетокот на следната година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
