Битолската група „Фолтин“ вечерва ќе настапи на „Битфест“ на летната сцена на „Тумбе кафе“.
Музиката на „Фолтин“ е духовита, страсна и жива, создава жешка танцувачка атмосфера преку брзиот ритам. Нивниот пристап во градењето на атмосферата е непредвидлив и оригинален. Освен на македонски, пеат и на таканаречен „спонтан eсперанто“, имагинарна смеса или фонетска имитација на светските јазици.
„Фолтин“ себеси се опишуваат како псевдоемигрантско кабаре, наведува организаторот на „Битфест“ во најавата за нивниот концерт.
Во составот на „Фолтин“ се: Пеце Николоски, Бранислав Николов, Пеце Трајковски, Гоце Јованоски, Славчо Јовев и Маријан Станиќ. Постојат 18 години, имаат седум самостојни албуми, музика за повеќе од дваесет театарски претстави и многубројни настапи во Македонија и во повеќе земји од светот.
За нивната работа и неколкупати се наградувани. Последниот албум „Пијан славеј“ излезе годинава, во продукција на НУ Центар за култура од Битола.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
