Охридската полиција поднесе кривична пријава за лицето О.А. од Гостивар, осомничен дека е сторител на 18 казнени дела тешка кражба.
Според информациите од СВР Охрид, 20-годишниот гостиварец во текот на овој месец во 18 наврати извршил тешки кражби, провалувајќи во повеќе куќи, станови и деловни објекти низ Охрид при што се здобил со противправна имотна корист од 299 илјади денари.
Осомничениот О.А. користејќи соодветен алат и физичка сила, насилно влегувал во куќите и деловните објекти по што откако ќе извршел пребарување во внатрешноста одземал пари, златен и сребрен накит, мобилни телефони, апарати, парфеми и други предмети.
Инаку, работејќи на реализација на тешките кражби, СВР Охрид оформи предмет со прецизни оперативни информации, по што деновиве беа пронајдени повеќе сторители и беа поднесени неколку кривични пријави за лица од Република Македонија, Босна и Херцеговина и од Србија. По добиени наредби од Основниот суд во Охрид беа извршени претреси во домовите на пријавените и беа пронајдени дел од бесправно одземените предмети.
Податоците покажуваат дека СВР Охрид бележи зголемена ефикасноста во расветлувањето на казнените дела „тешка кражба“. Според аналитичките показатели, од пријавените тешки кражби во јули оваа година, реализирани се 24 дела што претставува зголемување во однос на реализираните девет во истиот период лани. Тоа воедно значи зголемување на откривачката функција која во јули годинава изнесува 60 проценти додека во истиот период лани ефикасноста во откривањето на сторителите на тешките кражби била 50 проценти
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
