САД донираа 200 илјади долари на МВР за подобрување на форензичарските капацитети

­ Во рамки на програмата ИЦИТАП, МВР од САД доби донација за реновирање на складиштето на докази и простории за нивна обработка, во вредност од 200 илјади американски долари, со што ќе се подобрат форензичарските капацитети во Одделот за криминалистичко­-технички испитувања и вештачења.

Министерот за внатрешни работи Митко Чавков и амбасадорот на САД во Македонија Џес Л. Бејли нагласија дека донацијата е резултат на партнерството на САД со Македонија и заедничката решеност да се зацврсти владеењето на правото.

Според Чавков, во овој проект прв пат се обезбедување примена на нов и софистициран концепт за складирање, организација и постапување со обезбедениот доказен материјал. Во рамки на соработката со ИЦИТАП, обезбедена е и платформа за развој и имплементација на системско решение со кое се обезбедува интеграција на сегментите за криминалистичка техника низ државата со Одделенијата за криминалистичко­технички испитувања и вештачења. ­

– На овој начин, Одделот за криминалистичко­технички испитувања и вештачења и МВР дополнително ќе гарантираат за интегритетот на доказниот материјал, како и за квалитетот на извршените анализи и вештачења кои се однесуваат на истиот – рече Чавков.

Тој додаде дека е поставен нов концепт на единствено означување и баркодирање на доказниот материјал со што во иднина ќе се обезбеди негтово следење во реално време.

Амбасадорот Бејли потенцира дека најважно и приоритетно е тоа што реновираните и модернизирани простории ќе им помогнат на претставниците и на оние кои ги спроведуваат законите во Македонија, но и на обвинителите подобро да им служат на граѓаните. ­

– Зградата е комплетно реновирана со донација од 200 илјади американски долари и е мултифункционална модерна установа за собирање, ракување и обработка на докази со различни методи, рече Бејли, додавајќи оти со подобрените процедури ќе има и поголема достапност на важните докази во кривичните судења, а ќе овозможува и по правични судења во насока на прифатливоста на доказите во кривичната постапка.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.