Македонија ќе бара екстрадиција на уапсениот Османи од Косово

Министерството за внатрешни работи од страна на косовските полициски служби беше известено дека е приведен Сулејман Османи (55) од село Брест, за кого МВР имаше издадено меѓународна потерница распишана преку Интерпол.

Како што соопшти денеска МВР, тој како припадник на елиминираната криминално терористичка група во полициската акција од 9 мај годинава во Куманово е осомничен за кривично дело „тероризам“. За него постојат сомненија дека учествувал и во нападот на Полициската станица Гошинце во кој беше одземена поголема количина оружје.

Според информациите од Косово, стопи во соопштението, тој е лоциран од специјалните полициски единици во куќа во село близу македонскокосовската граница. При претресот кај него е пронајден и одземен и еден пиштол со муниција.

Од страна на Судија на претходна постапка, во отсуство на осомничениот му е одредена мерка притвор во траење од 30 дена. МВР согласно законските одредби ќе го информира Министерството за правда на РМ за започнување на екстрадициската постапка.

О.С. беше уапсен по акцијата во кумановско Диво насеље, меѓутоа успеа да побегне по пропустите направени од полициските службеници на терен, во моментот кога ја посочуваше локацијата на која било сокриено оружјето украдено од ПС Гошинце. Против полициските службеници, задолжени за негово обезбедување од страна на Секторот за внатрешна контрола и професионални стандарди при МВР е започната дисциплинска постапка поради евидентираното непрофесионално постапување.

Инаку, на крајот од април годинава, неколку дена по нападот врз полициската станица за гранична контрола во Гошинце, во претресот во објекти во село Брест, сопственост на осомничениот беа откриени и одземени две автоматски пушки 7,62 мм. со пет рамки и 100 куршуми калибар 7,62 мм. за автоматска пушка, две снајперски пушки 7,9 мм. со три рамки и 20 куршуми калибар 7,9 мм., 10 пиштоли М57ТТ 7,62 мм. со 22 рамки и 9 куршуми 7,62 мм. за пиштол, футрола за пиштол, една радио станица со два полначи, маскирна униформа со ознаки од „УЧК“, како и делови од облека, и други предмети. Беше утврдено дека запленетото оружје е дел од оружјето одземено при нападот на полицискиот објект.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.