Финансиската полиција вчера го уапси лицето М.Р од Скопје кое се сомничи дека е иницијатор и организатор на криминална група специјализирана за финансиски криминал тежок 372.000 евра. Според податоците од истрагата, уапсениот М.Р во периодот 2012-2013 година организирал мрежа од повеќе фирми кои добиле различни улоги во криманалниот потфат за незаконски поврат на ДДВ од буџетот на Република Македонија. Во бизнисот со ДДВ директно биле вклучени фирмите ХЕРОНЕЈА ПЛУС ДООЕЛ управувана од братот на првопријавениот, КАЛИЈАНИ ДООЕЛ управувана од лицето Д.Џ и МЕТАЛОПЛАСТИКА-ГРУП ДООЕЛ управувана од лицето С.Д сите од Скопје. Преку овие фирми уапсениот М.Р со помош на лица кои добро биле запознаени со системот за поврат на ДДВ успеал буквално да украде од државниот Буџет сума од 372.000 евра.
Кривичното дело е сторено така што првопријавениот преку управителите на фирмите кои биле под директна негова команда, до належните служби за поврат на ДДВ во текот на 2012 и 2013 година доставил фалсификувани ДДВ пријави со наводно побарување за поврат на повеќе уплатено ДДВ. Па така фирмата ХЕРОНЕЈА ПЛУС ДООЕЛ управувана од неговиот брат инкасирала вкупно 132.000 евра, фирмата КАЛИЈАНИ ДООЕЛ управувана од лицето Д.Џ инаку познат скопски престапник инкасирала вкупно 112.000 евра и фирмата МЕТАЛОПЛАСТИКА-ГРУП ДООЕЛ управувана од лицето С.Д инкасирала вкупно 128.000 евра.
Откако парите од државниот Буџет биле префрлени на банкарските сметки на овие три фирми, првопријавениот М.Р за да го скрие трагот на парите и целата криминална операција, дал насока на управителите кои биле под негова команда дел од парите да ги извадат во кеш и да му ги дадат нему лично додека другиот дел бил трансфериран кон фирмите МАКИ КОМ ГРУП и АСП АСО кои исто така се контролирани од групата и од каде понатаму се извадени во кеш.
За добро завршената работа, организаторот на бизнисот со поврат на ДДВ првопријавениот М.Р на инволвираните лица им исплатил помала сума на пари како благодарност за успешно завршената работа, а остатокот од пленот го задржал за себе.
Судија на претходна постапка од скопскиот Кривичен суд на уапсенот М.Р му одреди мерка притвор во траење од 30 дена а на лицето С.Д му е одземена патната исправа и ќе се брани од слобода. Трите лица кои се сеуште недостапни за органите на прогонот ќе се бараат со соодветни потерници.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
