Канскиот фестивал посветен на жените во филмот

Претстојниот, 68. Филмски фестивал во Кан ќе ја претстави својата нова програма која е посветена на жената во филмот и ќе бидат доделени две награди.

Програмата е наречена „Жени во движење“ и е во соработка со француската компанија за луксузна стола „Керинг“. Од почетокот на фестивалот, само една режисерка успеала да освои „Златна палма“ – Австралијката Џејн Кемпион за филмот „Пијано“ во 1993 година.

Организаторите на овој фестивал многу често се обвинувани за сексизам и токму поради тоа тие сега ќе се обидат да ги ублажат полемиките со оваа програма која има за цел да го истакне и да го награди придонесот на жената во седмата уметност.

Фестивалот ќе се одржи од 13. до 23 мај и на програмата ќе се одржат неколку разговори на тема местото на жената во кинематографијата, нејзината застапеност во професијата, како и женскиот пристап во нарацијата и снимањето. По тој повод ќе бидат доделени две награди – една на која ќе ѝ биде одадено признание на некоја од истакнатите личности на филмската индустрија која значително придонела за промоција на жената, а другата награда ќе ѝ биде врачена на некоја млада режисерка.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.