Скандалозниот статус кој пред два дена го објави претседателот на „Достоинство“ Стојанче Ангелов, во кој вели дека сака заедно со УЧК да оди против власт на ВМРО-ДПМНЕ, наиде на остри критики и осуда од народот.
Tој реплицирајќи му на новинарот Драган Павловиќ- Латас, вели дека е подготвен со УЧК и командантот Валтери од ветераните на УЧК да оди против власта и Латас. Притоа, тој го моли уредникот на Алсат-М, Мухамед Зекири да му организира и ТВ емисија со командантот Валтери.
-Овојпат нема да бидам против него! Овојпат со него ќе бидам против тебе! Против тебе и овој гнасен и криминален режим!, пишува Ангелов.
На овој начин, Ангелов самиот потврди дека се основани написите во дел од медиумите во кои се наведуваше дека постои сценарио во кое Ангелов е подготвен заедно со Заев и со помош на радикални исламисти да предизвика обид за дестабилизација на Македонија, написи заради кои тој се закануваше со ликвидација на новинари за сега самиот да се демантира себеси со оваа јасна изјава за желба за сојузништво со УЧК.
Оваа Фејсбук изјава на Ангелов наидува на огромен револт на социјалните мрежи каде што дел од граѓаните жестоко реагираат на скандалозната изјава на лидерот на „Достоинство“ со која тој изразувајќи отворени симпатии кон УЧК, дефинитивно го избриша во еден момент сето свое минато како некогашен припадник на безбедносните сили. После ова, тој нема никакво морално право ни да зборува за бранителите, а камо ли пак да се обидува да се повикува на нив.
Дел пак од граѓаните на социјалните мрежи изразуваат емпатија и сериозна загриженост за психичката состојба на Ангелов. Дијаметралните различни ставови со кои настапува во јавноста, честото менување на ставовите, нагласената агресија и заканите кои ги упатува кон сите, желбата за актуелност и визибилност по секоја цена дури и со ексцентрични настапи, како и изразувањето на отворени симпатии кон УЧК против која во дел од својата кариера се бореше како припадник на полицијата се сериозни знаци кои укажуваат на многу веројатно растројство на личноста кое може да е резултат на посттрауматски воен синдром.
Ангелов оди дотаму што објавува на својот профил монтирана фотографија на која носи капа со ознаките на УЧК и за истата вели дека му се допаѓа.
Во дел од коментарите на Фејсбук, граѓаните дури и замолуваат Ангелов да не биде критикуван заради оваа своја срамна изјава и се апелира тој да не е предмет на критика или пак на третирање, затоа што веројатно има нешто психичко што е посилно од него и треба да му се помогне.
Ваквата изјава на Ангелов голем дел, пак, ја сметаат за продолжување на додворувањето на опозицијата кон Албанците поради недостигот на посакуваниот ефект на сценариото. Додворувањето не престанува откако истото започна со понудата преку опозицискиот Фокус, Албанец да биде премиер, а за директор на јавниот сервис да биде именуван уредникот на Алсат, Мухамед Зекири.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
