Откриени австралиски пари за финансирање на поддржувачите на ИД

Финансиските инспектори за борба против перењето на пари во Индонезија откриле дека дел од средствата со кои се финансираат лицата што вршат пропаганда и регрутација на борци за заминување на боиштата во Ирак и Сирија, потекнуваат од Австралија.

Трагата на валканите пари е откриена во соработка со австралискиот Центар за трансакции и финансиска анализа.

Досега се откриени траги на неколку стотини илјади австралиски долари кои биле наменети за актвностите за поддршка на групата Исламска држава.

Откривањето на австралиските фондови за поддршка на Исламската држава уште повеќе ја разбранува јавноста во Индонезија, која бара државата без одлагање да донесе построги закони против исламскиот радикализам, кој е потенцијална опасност и за мирот во Индонезија и во соседната Малезија.

Денешниот „Џакарта пост“ објави список на групи кои го поддржуваат и промовираат исламскиот радикализам, при што е откриено дека 19 од 27 познати милитантни групации имаат седишта во Индонезија.

Експертот за антитероризам од универзитетот Нанјанг во Џакарта, професорот Рохан Гунаратна потсетува дека радикални муслимански лидери лани, неказнето, јавно ги повикувале жителите на Индонезија да се вклучат во поддршката на Исламската држава.

Според Гунаратна, во Индонезија сега има над 200 интернет сајтови кои ја шират пропагандата на Исламската држава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.