Уапсени петмина организатори на регрутацијата на џихадисти во Индонезија

Индонезиската антитерористичка полиција вчера уапсила петмина организатори на регрутацијата на борци за Исламската држава. Повод за нивното апсење се резултатите од истрагата за тоа како група од 16 индонезиски државјани, меѓу кои 11 малолетници и 4 жени успеале како туристи да допатуваат во Турција, а биле уапсени во градот Газиантеп, при обид илегално да влезат во Сирија.

Апсењето на организаторите на регрутацијата на потенцијални радикални исламисти го актуелизира и прашањето, како најбројната муслиманска држава на светот ќе се справува со ангажирањето на нејзини граѓани за борби во Исламската држава. Сегашните закони на Индонезија не предвидуваат казни за тие што заминуваат на боиштата на калифатот, а единствената мерка, за сега, е одземањето на пасошите на тие што се вратиле од боиштата во Ирак и Сирија.

Еден од вчера уапсените организатори на регрутацијата бил фатен во сличен обид во јануари годинава, кога врбувал шестмина млади Индонезијци за учество на боиштата во Исламската држава. Единственото обвинение поднесено против него било учество во фалсификување на документи.

Според денешниот Џакарта пост, минатата година во Исламската држава во борбите на страна на радикалните муслимани учествувале 600 граѓани на Индонезија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.