Делчевци масовно да излезат на гласање на локалните избори на 24 март и да се определат за опцијата што носи развој и го исполнува дадениот збор, повика премиерот и лидер на ВМРО-ДПМНЕ, Никола Груевски, на митингот на коалицијата „За подобра Македонија“ во Делчево.
Груевски побара доверба за кандидатот за градоначалник, Дарко Шехтански, и за листата за советници, чиј носител е Драган Христов, бидејќи, како што истакна, тие ќе бидат партнери на Владата за остварување на програмата во периодот од 2013 до 2017 година.
– Со таа програма е предвидено изградба на технолошко-развојна зона покрај патот за граничниот премин „Црна Скала“. Ќе инвестираме во изградбата на таа и на економската зона „Долни бавчи“, за во нив да привлечеме странски, но и домашни инвеститори, кои овде ќе лоцираат нови фабрики и ќе отвораат нови работни места – рече Груевски.
Според него, од конкурентската политичка опција досега имало само закани и лажни ветувања, но без конкретни програми и конкретни дела.
Кандидатот за градоначалник ги претстави своите планови за натамошен развој на инфраструктурата на општината и за отворање нови работни места. Вети стотината конкретни проекти, меѓу кои и реконструкција на патот Делчево – Голак, регулација на коритото на Брегалница, изградба на прочистителна станица.
На митингот беше истакнато дека во изминатите четири години, во тек на мандатот на досегашниот градоначалник Горан Малешевски, се изградени нови детски игралишта, патишта до повеќе населени места, мост на реката Желевица, кај село Тработивиште, спортски сали за средното училиште „Методија Митевски – Брицо“ и основното училиште „Св. Климент Охридски“, како и голем број реконструирани улици и објекти.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
