Во интервју за ревијата на Атлетико Мадрид, „Града“, нашиот познат ракометар Кирил Лазаров своите навивачи ги запозна со важни детали за својата кариера. Меѓудругото вели дека не може да каже во која од земјите каде што настапувал му било најубаво, но од сите земји научил по нешто. Горд е што е Македонец и што неговото семејство и пријателите живеат во Македонија.
„Во Македонија минав многу години, пет години бев во Хрватска, уште пет во Унгарија, сега сум трета година во Шпанија. Имам богато искуство од сите земји и од секаде научив по нешто. Најдраг трофеј од сите 32 кои ги освоив ми е светската титула во Катар,“ вели Кире и додава дека да е биде капитен не е лесна работа.
„Треба да работиш понапорно од сите, да бидеш пример за сите во и надвор од теренот. Мислам дека добро го правам тоа. Во кариерата на еден спортист има момент кога постигнуваш важни голови и кога промашуваш. Но, секогаш треба да веруваш во себе. Ако не си успеал, треба напорно да тренираш и ако си заслужил, резултатот ќе дојде, “ додава Кире.
Негова неостварена цел е освојување на Лигата на шампионите.
„Долго време се борам да ја освојам, одиграв многу полуфиналиња и две финалиња со „Сиудад Реал“ и „Атлетико Мадрид“ и убеден сум дека еден ден ќе ја освојам. Оваа сезона ни недостига еден добар натпревар. Играме против силен противник и треба да веруваме во нашите можности. Имаме многу квалитетни ракометари, сезонава не не штедеа повредите, но треба да ги искористиме овие играчи и овој клуб,“ вели Кире во интервјуто.
Лазаров не може да издвои кои биле неговите најубави и најлоши моменти во кариерата. „Ги имаше многу, ќе ги има уште многу. Штом ќе ја завршам кариерата ќе размислам и ќе одберам,“ заврши Лазаров.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
