Кливленд поуспешен во дербито против Клиперс, Далас лесно на гостувањето кај Сакраменто (видео)

Кливленд е тимот кој има најмногу победи во серија во НБА-лигата. Со синоќешниот триумф во дербито против Клиперс (105-94) успеа да врзе 12 победи по ред и во овој момент нема друг тим што е во таква форма како еден од тимовите кои се аспиранти за шампионскиот прстен оваа сезона.
Кралот Џејмс беше предводник за својот тим со 23 поени и девет асистенции. Одличен натпревар одигра и Кевин Лав со 24 коша, а тренерот Давид Блат се реши да ги остави на клупата во четвртиот период кога тимот по завршување на третата четвртина имаше дури 32 поени предност.
Еден од главните играчи на Клиперс Крис Пол беше незадоволен од судењето на синоќешниот натпревар бидејќи судиите во клучниот период досудија дури пет технички грешки. Главен „виновник“ за тоа е судијката Холткамп која до лани судеше во понизок ранг на натпреварување, односно во развојната НБДЛ лига.

– Тоа е апсурдно. Судеа непостојни фаули и на нашата реакција лесно добивавме технички грешки. Ако е така, тогаш можеби ова не е за неа – изјави кратко по натпреварот Крис Пол.

Со оваа победа Кливленд го мина Чикаго на лидерската позиција во дивизијата „Централ“.

Иако ослабени без најдобрите играчи Ражон Рондо и Дирк Новицки, Далас без проблеми славеше победа на гостувањето кај Сакраменто со 101-78. Тајсон Чендлер беше фантастичен со дабл-дабл учинок од 16 поени и 15 скока, додека Монта Елис беше лидер за Далас со 21 поен.
Во останатите два натпревара одиграни синоќа беа постигнати следните резултати:

Шарлот – Вашингтон 94-87 и Портланд – Феникс 108-87.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.