Шефот на Мосад, Тамир Пардо ги негираше денеска тврдењата дека им рекол на сенатори од САД оти е против натамошни санкции за Иран додека траат преговорите со светските сили за нуклеарната програма на таа држава.
Во соопштението на Пардо се наведува дека имал состанок со сенаторска делегација на 19 јануари на нивно барање и со одобрение од изралескиот премиер Бенјамин Нетанјаху.
– Спротивно на тоа што е изнесено во јавност, шефот на Мосад не рекол дека е против воведување дополнителни санкции за Иран, се вели во соопштението.
Во него се додава дека „шефот на Мосад нагласил на состанокот дека ефикасноста на санкциите кон Иран во изминатите години е тоа што го донело Иран на преговарачка маса“.
Соопштението е издадено откако американски медиуми јавија дека Пардо заземал став спротивен на Нетанјаху, а тоа е дека натамошни санкции за Иран негативно би влијаеле врз преговорите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
