Годишен концерт на фолклорниот ансамбл „Тиквеш“

В сабота, на 17 јануари 2015, со почеток од 19.30 часот, во салата на Домот на културата „Иван Мазов – Климе“ во Кавадарци ќе се одржи традиционалниот Годишен концерт на фолклорниот ансамбл „Тиквеш“, кој работи при кавадаречкиот Дом на култура.

На концертот ќе настапат три постави на ансамблот, а како гости ќе се појават играорци од различни генерации.

В понеделник, на 19 јануари 2015, со почеток од 19 часот во Галеријата при Домот на културата ќе биде отворена изложба на познатиот кавадаречки и македонски ликовен уметник Владимир Темков. Изложбата содржи дела од неговиот најнов творечки циклус, кои првпат се појавуваат пред ликовната јавност и носи наслов „Житни полиња – трски и топки“.

По успешната Премиера и полниот салон во првите две репризни изданија, Театарот при Домот на културата во Кавадарци в среда, на 21 јануари во 19 часот повторно ќе ја игра претставата „Сомнително лице“, по текст на Бранислав Нушиќ, а во адаптација и режија на Диме Коцевски. Со оглед на тоа што за претставата се бара карта повеќе, кавадаречките актери имаат театарски производ кој долго ќе биде на репертоарот на матичната сцена во кавадаречкиот Дом на култура.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.