Поетскиот карван на ДПМ продолжува во Свети Николе

Новиот циклус од 17 поетски карвани Друштвото на писателите на Македонија го почнува во Свети Николе. Во соработка со Меѓународниот славјански универзитет „Гаврило Романович Державин“ од Свети Николе, поетскиот карван на ДПМ во овој град ќе гостува на 16 јануари во 19 часот. Во големиот амфитеатар на Универзитетот ќе настапат 20 истакнати македонски поети од повеќе генерации. На отворањето на манифестацијата ќе зборуваат д-р Јордан Ѓорчев, од името на Славјанскиот универзитет, и Веле Смилевски, претседател на ДПМ. Договорено е оваа средба да биде традиционална и секоја година да се одржува во втората половина на јануари.

Новиот циклус поетски каравани Друштвото на писателите на Македонија во текот на оваа година ќе го реализира во рамките на проектот за дисперзија на културните настани во Македонија. Покрај договорената соработка за оваа манифестација со библиотеките во Гевгелија, Куманово и Велес, со Домот на културата „Иван Мазов“ во Кавадарци, со литературните манифестации „Караманови средби“ во Радовиш и „Ганеви денови“ во Кожле, поетите ќе го продолжат караванот и во Струмица, Тетово, Битола, Штип, Лазарополе, Македонски Брод, Кичево, Демир Хисар, Крушево и во Ресен. Поетскиот карван ќе заврши со традиционалната манифестација „Средба на генерации“ во рамките на Деновите на Блаже Конески кои секоја година се одржуваат од 17 до 19 декември, денот на раѓањето на големиот македонски поет, основоположник и прв претседател на македонската писателска асоцијација. Во поетскиот карван на ДПМ низ Македонија ќе учествуваат 80 поети од сите генерации.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.