На отворањето на трезорот во Народна банка на Србија со наследството на Јосип Броз Тито не смеат да присуствуваат неговите наследници. Вака одлучиле српските власти, а за таа цел е формирана тричлена комисија од Претседателството на Србија.
Во трезорот на НБС се наоѓаат 11 пломбирани вреќи со предмети што припаѓале на маршалот, а сега треба да се поделат во оставинската постапка.
Адвокатите на семејството на Тито сметаат дека е логично и тие како наследници да присуствуваат на отворањето.
Застапничката на синот на Тито, Мишо, вели дека е нормално тие да присуствуваат на отворањето затоа што наследниците сами дознале каде се вреќите и барале од властите нивно отворање.
Адвокатот на внукот на Тито, Јошка, пак, вели дека трезорот може да се отвори и без нив, но само вештаци што ќе ги ангажира судот, можат да утврдат што е приватна сопственост на Тито, а што е државно.
На отворањето на вреќите со Титовото „богатство“ нема да присуствуваат ниту претставници од банката.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
