Перо Антиќ со Атланта лидери на источната конференција (видео)

Синоќа во НБА лигата беа одиграни 11 натпревари.

„Јастребите“ од Атланта се искачија на првото место на табелата во Источната конференција со победата над Јута на гостински терен од 98-92 со 24 победи и само осум порази.
Перо Антиќ доби поштеда од тренерот Мајк Буденхаузер и воопшто не учествуваше во победата, но тоа не ја намали фаворитската улога на неговиот тим.
Поранешните играчи на Јута а сега соиграчи на Антиќ, Милсап, Корвер и Керол беа немилосрдни кон поранешниот тим у вкупно комбинираа 34 поени и беа одлична подршка на Џеф Тиг кој постигна 26 поени и осум асистенции.
Добропознатата одбрана на Атланта повторно беше клучна за успехот бидејќи задржа „Џезерите“ на само 37 проценти успешен шут од поле.

Првпат откако си замина од Бостон по осум години поминати во „Ти-ди Гарден“ Ражон Рондо се врати со својот нов тим Далас во стариот дом. Тој беше пречекан со бурни овации, но тоа не го спречи да го одведе Далас до нова победа од 119-101. Постигна 29 поени, дури пет тројки, пет асистенции и четири скока. Монта Елис додаде 22 коша исто колку што имаше и Ејвори Бредли на другата страна.

Кливленд конечно успеа да дојде до победа по трите порази во серија. Иако без Леброн Џејмс кој ќе отсуствува од терените неколку недели, „Кавалерите“ славеа победа на гостувањето кај Шарлот со 91-87. Кевин Лав и Кајри Ирвинг беа предводници на својот тим со 27 односно 23 поени.

Резултати:

Шарлот – Кливленд 87-91, Орландо – Бруклин 98-100, Бостон – Далас 101-119, Њујорк – Детроит 81-97, Њу Орлеанс – Хјустон 111-83, Оклахома – Вашингтон 109-102, Милвоки – Индијана 91-94, Феникс – Филаделфија 112-96, Јута – Атланта 92-98, Голден стејт – Торонто 126-105, ЛА Лејкерс – Мемфис 106-109

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.