Советот на општина Охрид ја усвои одлуката за субвенционирање евтини авио летови од аеродромот „Свети Апостол Павле” во Охрид. Средствата се лимитирани на 36 милиони денари и ќе се исплаќаат директно од буџетот на општина Охрид, во четири рати. Во 2015 година – 6 милиони, 2016 и 2017 – 12 милиони и во 2018 година, уште 6 милиони.
На почетокот ќе се субвенционираат само сезонските летови, а веќе од 2016 година ќе се субвенционираат и редовни авио линии кои ќе бидат финансиски подржани од страна на општина Охрид. Авионските летови ќе соо браќаат меѓу Охрид и лондонскиот аеродром Лутон.
– После ова следува изработка на квалитетна тендерска документација и претпоставувам дека овај пат ќе се јават заинтересирани страни односно авио компании кои што ќе ги прифатат условите за финансиска поддршка за воспоставување прво на сезонски, а потоа и редовни летови до и од охридскиот аеродром. Ова претставува стремеж на сите туристички работници, меѓутоа и на граѓаните на Охрид и Република Македонија за воспоставување на врска кон и од охридскиот аеродром – рече пред советниците градоначалникот на Охрид Никола Бакрачески.
Бакрачески вели дека и Министерството за транспорт и врски ќе се вклучи со субвенционирање на авио летови по теркот како што го правеа до сега за скопскиот аеродром.
– За прв пат оваа година, после нашето лобирање пред државните органи, покрај субвенционирање на летови за скопскиот аеродром ќе бидат субвенционирани и летови кон охридскиот аеродром. Се работи за субвенционирање на летови помеѓу Базел и Охрид што во принцип значи развојна стратегија на туризмот во Охрид. Во 2015 година ќе имаме најмалку две линии кон и од охридскиот аеродром – додава Бакрачески.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
