Како што доликува според новиот систем на натпреварување во домашната фудбалска Прва лига, дербито меѓу Вардар и Работнички в недела од 17 часот ќе одлучува за есенската титула. Најтрофејниот Вардар и актуелниот шампион Работнички на националната арена „Филип Втори“ во Скопје ќе бијат битка за врвот, кој моментно им припаѓа на „црвено-црните“. Тие славеа во првиот меѓусебен меч сезонава со 2-0 во рамките на осмото коло, што беше последен пораз за Работнички. Оттогаш почна импресивната серија на „романтичарите“ кои нанижаа осум победи и се пробија на втората позиција со 34 бода. На ред е последното есенско, 17. коло и во фокусот е дербито на соседите од Градски парк. Вардар со 37 бода е лидер, в недела и со реми ќе го одбрани врвот, но и најмоќниот клуб кај нас, со најголем буџет, покажа дека е ранлив, што е шанса за актуелниот првак. Првиот пораз сезонава од Ренова со 0-3 во 16. рунда ја откри слабата страна и на вардарци, па ќе биде интересно да се проследи дербито против забревтаниот шампион Работнички.
За конечен расплет и шампионски трофеј е рано, но и есенската титула си има свој шмек, особено кога за неа се одлучува на дерби меѓу градските ривали од Скопје.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
