Реакција на Комисијата за односи со верските заедници: Зошто е непри­фат­­ли­во за Вас дека пос­тојат Македонци муслимани?

Директорката на Реакцијата на Комиција за односи со верските заедници и реалигиозни групи, Валентина Божиновска упати реакција до исламската верска заедница на Република Македонија, а по повод изјавата на Реис Ул Улема Хаџи Сулејман Ефенди Реџепи. Ја пренесуваме реакција во целост.

Ефенди, Ефенди,

За жал уште еднаш се огласувате небаре сте претседател на политичка партија, а не прет­седател на втората по големина верска заедница, Исламската верска за­ед­ница. Зар личи и при­личи првиот човек кој треба да биде гласник на обединувањето, помирува­ње­то, љу­бов­­та, кој треба да биде пример на нацијата со богоугодни зборо­ви и реторики, Вие, Ефен­ди, сурово да ги нападнете Македонците мус­лимани.

Кој верски лидер се дрзнува да го скрши македонското нацио­нал­но ткиво и луѓето кои во одреден историски период беа исла­ми­зирани и кои се чувствуваат како Македонци, да ги нарече ин витро нација. Што сте вие, Ефенди? Претседател? Потпретседател? Порт­парол на одредена политичка партија? Или, верски лидер чија задача е да поста­пу­ва разумно, мудро и да не ги загрозува високите човечки морални вредности? Убаво би било да тргнете еден ден по Река, да појдете во Жировница, во Велебрдо, во Ростуше и да го слушнете тој најубав певлив македонски јазик, тоа ретко патриотско чувство кое го имаат за македонската држава, тие прекрасни духовни луѓе кои и се чувствуваат Маке­дон­ци и дишат на македонски и според ликата и приликата на еден поединец не е важ­но колку ги има по број, важно е колку се корисни како поединци во државата. Тие се, Ефенди, и ко­рис­ни и духовни и по јазикот и по чувството им македонско и по ставот им национален македонски. Имаат право на сопствена веро­ис­повед и на сопствено нацио­нално чувство.

Сетете се за што се залагаше покојниот – стожер на Исламската верска заедница, еф. Ја­куб Селимовски, кој беше дел од нив и со как­ва љубов зборуваше за нив. Зошто е непри­фат­­ли­во за Вас дека пос­тојат Македонци муслимани. Како што постојат Албанци мусли­ма­ни, Албанци католици, Албанци православни.

Ефенди, многу навреда фрливте врз Македонците муслимани. Отворете го Куранот, Сура 23, 43 „Ниеден народ не може ни да го забрза ни да го задоцни рокот негов“ (цитат од Куранот).

Ете, Ефенди, ова Ви го цитирам од Светата книга Куранот. А се­га наместо понатамошно беседење од моја и од Ваша страна, Ви пре­то­чувам една од песните со најсликовито опишано чувство на Маке­до­нецот муслиман, чиј автор е единствениот Сами Жарноски:

Ме викате Торбеш, но мојот прадедо
вера не би менил ни за торба сребро.
Меса му капеле под кундаци силни
животот му течел од жилите сини.

Ме виката Торбеш но горам од љубов
за секоја грутка на мојава земја.
Вардар, Пирин, Егеј ми го пленат умов
на срце ги носам како пролет цветна.

Не викајте ме ТОРБЕШ
Зошто ѕвездите ќе ми изгаснат во очиве
и ќе се исцедат како солзи на доенче.

Не викајте ме ТОРБЕШ
зашто и сонцето пци ќе ми го исколат
и кобили со врели копита
градиве ќе ми ги здробат.

Не викајте ме ТОРБЕШ
зашто ќе ми пресушат потоците во жиливе
а утробата одрана кожа ќе ми се стори.

Не викајте ни ТОРБЕШ
зашто кринов цвет ни вовирате во мишкиве суви
што ги притајуваме со болка и надеж и вера
во секое наше утре.

Не викајте ни ТОРБЕШ
зашто млекото ќе им се пресуши
на момиве наши со заруменети образи,
а на ергените красти ќе им ги искинат кожите.

Не викајте ни ТОРБЕШ
и не вовирајте ни нокти во мозокот
нас не ќе не’ сотре безименоста.

Со почит,

ДИРЕКТОР,

Проф.д-р Валентина Божиновска

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.