Утврдено како се одвивала крвавата драма во Кавадарци

Т.С околу 16 часот се упатил во куќата на родителите на неговата сопруга со која се во бракоразводна постапка и по кратка расправија со сега починатата Билјана Л. и Снежана Л., со огнено оружје- пиштол кој го носел со себе испукал по еден куршум во пределот на градите. Потоа, се качил на катот од куќата каде го пронашол Илија Л. во кој испукал еден куршум во пределот на градите, по што го напуштил лице местото. Од здобиените повреди на лице место починале сопружниците Билјана Л. и Илија Л., додека нивната ќерка Снежана Л. им подлегнала на повредите во Општа болница Кавадарци.

Вака се одвивала крвавата драма во домот на Леови во Кавадараци во неделата. Ова е утврдено од страна на полицијата по извршениот разговор со 40-годишниот Т.С. во полициската станица.

Тој е уапсен вчера откако по претходно добиени оперативни сознанија извршен е претрес на терен на северната страна на градските гробишта во Кавадарци, при што осомничениот бил забележан од страна на полициските службеници на оддалеченост од околу 20 метри, информираат од МВР.

-Притоа, издадена му е наредба да застане, но истиот извадил огнено оружје – пиштол и за цело време го држел во десната рака со цевката надолу кон земјата. Повторно му е издадена наредба „стој полиција“ која наредба ја одбил и се дал во бегство, по што од страна на полициски службеник испукани се неколку предупредувачки истрели во воздух. Осомничениот продолжил да бега низ околните улици, за да на крај повторно влегува во просторот на градските гробишта каде е обиколен од повеќе полициски службеници. По кратко убедување истиот го спуштил пиштолот и од страна на полициските службеници е лишен од слобода, велат од МВР.

Осомничениот Т.С. со кривична пријава поради основи на сомнение за сторено кривично дело „убиство“ е  изведен пред надлежен Јавен обвинител, a Судија на претходна постапка му одреди мерка притвор во траење од 30 дена.

 Осомничениот претходно бил пријавуван за насилство и телесни повреди.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.