Првото „Хард Рок Кафе“ во регионот ќе биде отворено во наредните неколку месеци во Подгорица, во комплексот „Атлас Капитол Центар“.
Лобирањето една од најпознатите угостителски марки да дојде во Подгорица, а не да кажеме во милионскиот Белград, успешно го одработиле сопствениците на „ Капитол Инвестмент“ од Абу Даби, сопственици на „Атлас Капитол Центар“.
Кафе-ресторанот во Подгорица ќе биде прилагоден на сите високите стандарди на групацијата „Хард Рок“, што подразбира и повисоки цени во однос на останатите слични објекти.
Овие ресторани се препознатливи по автентичниот амбиент, комбинацијата на паб и ресторан со дополнителни продажни содржини во кои посетителите ќе можат да си купат сувенири и реквизити со познатото лого.
Ланецот „Хард Рок Кафе“ во моментов поседува 180 филијали во 55 земји, меѓу кои 40 кафетерии, 19 хотели и девет казина.
Во овие локали можете да најдете оргинални инструменти и музичка опрема од најпознати пеачи и групи во поп и рок музиката.
Првиот „Хард Рок“ е отворен 1971 година во Лондон, кога американците Ајзак Тигрет и Питер Мортон отвориле сопствен ресторан кој го нарекле „Хард Рок Кафе“. Интересно е дека локалот го изнајмиле само на шест месеци, но работата толку добро тргнала што денес се еден од најпрепознатливите марки во туристичко-угостителскиот свет.
Во моментов сопственици на ланецот „Хард Рок“ од 2006 година е индијанското племе Семиноле од Флорида, кое за 965 милиони долари ја превземало компанијата, вклучувајќи ја и огромната колекција предмети по кои е позната оваа марка.
Племето Семиноле има околу 12.000 членови и тие се посебни по тоа што се единственото американско племе кое никогаш не потпишало мировен договор со САД.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
